Era un dos favoritos na súa modalidade e non defraudou. O atleta Carlos Beltrán Álvarez vén de proclamarse campión de España sub 20 en salto de lonxitude, na proba disputada no mediodía deste domingo 4 de outubro no Estadio de Vallehermoso en Madrid, onde se daban cita máis de 500 deportistas, seguindo un riguroso protocolo de seguridade anticovid.
O atleta vianés residente na Rioxa e membro do Go Fit Athletics, acreditaba 7,31m en pista cuberta e neste campionato superábase a si mesmo, logrando un resultado de 7.43. O segundo clasificado en Madrid, Óscar Matilla, saltaba 7.32 metros e terceiro, Adriá Navajón, 7.21.
Carlos suma así o ouro ao seu palmarés no que tamén figuran, entre outras, unha medalla de prata lograda no Encontro Internacional sub 20 de pista cuberta disputado en febreiro deste mesmo ano; e unha de bronce no nacional de atletismo sub 18 celebrado o ano pasado, entre outras.
Dende Viana do Bolo, a súa familia e moi especialmente o seu tío Jorge Álvarez, celebran o resultado conseguido por esta xove promesa do atletismo español.
