ConcellosÚltima hora

Carlos Diéguez, natural de San Xoán de Río, medalla de Investigación da Real Academia Galega de Ciencias

Entre os galardoados nesta edición coas medallas tamén estaba o alaricano José Luis Mascareñas

O investigador Carlos Diéguez, natural de San Xoán de Río./ Foto: USC.

 

Entre os investigadores que na mañá deste martes 8 de outubro recibían as Medallas de Investigación da Real Academia Galega de Ciencias (RAGC) figuran dous ourensáns. Un deles é Carlos Diéguez González, natural de San Xoán de Río.

Así a medalla Ánxeles Alvariño, da sección de Bioloxía e Ciencias da Saúde, correspondíalle a este investigador, nado en Río en 1955, que é director do Centro Singular de Investigación en Medicina Molecular e Enfermidades Crónicas (CiMUS). Este catedrático de Fisioloxía da USC, con máis de 35 anos de carreira investigadora, é un referente a nivel mundial no campo da neuroendocrinoloxía.

Os seus máis de 580 artigos científicos foron publicados en revistas de gran prestixio como Nature ou The Lancet e ten dirixido máis de 40 proxectos de investigación. Entre os galardóns que recibiu figuran a medalla de ouro da Sociedade Española de Endocrinoloxía e Nutrición e o Premio Geoffrey Harris da Sociedade Europea de Endocrinoloxía, segundo a información da Universidade de Santiago de Compostela.

 

Este investigador de Río no momento de recoller o seu recoñecemento.

 

A entrega das medallas tiña lugar hoxe durante o acto académico de celebración do Día da Ciencia en Galicia, no Colexio de Fonseca, no que tamén se homenaxeou a figura de Tomás Batuecas, referente internacional na determinación dos pesos atómicos dos elementos químicos, e se leva a cabo a entrega dos Premios de Investigación Ernesto Viéitez. As Medallas de Investigación da RAGC distinguen a científicos e científicas de prestixio que desenvolvesen a maior parte da súa carreira investigadora en Galicia en cada unha das súas cinco seccións.

 

Os premiados nesta edición, entre os que tamén está o alaricano José Luis Mascareñas.

 

Entre os distinguidos neste acto había outro ourensán. Trátase do director científico do Centro Singular de Investigación en Química Biolóxica e Materiais Moleculares (CiQUS), José Luis Mascareñas (Allariz, 1961), que obtiña a medalla Antonio Casares Rodríguez, da sección de Química e Xeoloxía.

Mascareñas, catedrático de Química Orgánica da USC, é considerado un dos responsables da introdución en España da química biolóxica. Foi merecedor dunha Advanced Grant, a axuda de investigación máis prestixiosa do Consello Europeo de Investigación (ERC). Conta tamén coa Medalla de Ouro da Real Sociedade Española de Química, institución que lle encomendou a fundación do Grupo Especializado de Química Biolóxica.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close