Serán “concertos moi divertidos nos que faremos un percorrido por mil anos de música, pero por riba de todo será un acto de amor polo país”. Así resume o gaiteiro Carlos Núñez, a súa xira de concertos “Lugares máxicos”, que o levará por diferentes localizacións da provincia de Ourense ao longo dos meses de xullo e agosto para tocar en marcos do patrimonio histórico-artístico.
Os mosteiros de Oseira, Celanova e Santo Estevo, o Castelo de Monterrei e o Templo da Veracruz do Carballiño serán os lugares onde o máis internacional dos gaiteiros galegos amose o seu compromiso pola terra, “un acontecemento musical máxico polos lugares e polo protagonista”, dixo na presentación o presidente da Deputación de Ourense, Manuel Baltar, quen agradeceu “a aposta de Carlos Núñez por Ourense, un artista que utiliza a música como elemento de comunicación interxeneracional e internacional”, agradecendo “o apoio que prestan os concellos e os alcaldes de san Cristovo de Cea, O Carballiño, Celanova, Monterrei e Nogueira de Ramuín para acoller estes concertos que unen cultura, historia e talento, coa cooperación da Deputación”. Carlos Núñez remarcou a importancia da música tradicional como “chave para darlle vida á historia e as músicas medievais”.
O programa dos concertos comezará o vindeiro 21 de xullo no Mosteiro de Oseira onde Carlos estará acompañado por once nenos que interpretarán melodías cos instrumentos do Pórtico do Paraíso. O día 22 actuará no Templo da Veracruz, no Carballiño; e o día 24, no Mosteiro de Celanova. Posteriormente, o 4 de agosto o escenario será o Castelo de Monterrei, rematando a xira o 5 de agosto no Mosteiro de Santo Estevo de Ribas de Sil.
