O Mosteiro de San Pedro de Rocas acolleu hoxe, 10 de xullo, a presentación dos concertos que Carlos Núñez ofrecerá os vindeiros 27,28 e 29 de xullo nos mosteiros de Santo Estevo de Ribas de Sil, Oseira e Santa María de Montederramo. O propio gaiteiro vigués estivo acompañado nesta presentación polo presidente da Deputación, Manuel Baltar, e os alcaldes de Nogueira de Ramuín, Montederramo e San Cristovo de Cea.
En concreto, os concertos serán o 27 de xullo, ás 21:00 horas, no claustro dos bispos do mosteiro de Santo Estevo de Rivas do Sil; o día 28, ás 20:30 horas, na igrexa do mosteiro de Oseira, e o día 29, ás 21:00 horas, na igrexa do mosteiro de Montederramo. As entradas pódense adquirir na plataforma Ataquilla.com.
Os eventos, enmarcados dentro da iniciativa “A tradición medieval”, teñen como obxectivo poñer en valor os instrumentos do Pórtico do Paraíso, para o cal, nos concertos utilizaranse réplicas dos instrumentos que aparecen nesta xoia da catedral de Ourense, “unindo música, tradición e estes enclaves únicos pola súa riqueza histórica e patrimonial da provincia de Ourense”, dixo Manuel Baltar.
“Trátase de, a través da música, reivindicar a nosa identidade e o peso da cultura e da tradición dun pobo tan rico etnográfica e historicamente como o noso”, explicou Baltar, quen subliñou que esta iniciativa de colaboración entre a Deputación de Ourense e Carlos Núñez vai continuar no vindeiro festival “Pórtico do Paraíso” con diferentes actividades, entre as cales figura un concerto que o músico ofrecerá na catedral de Ourense en marzo de 2018.
Pola súa banda, Carlos Núñez explicou que este proxecto “vai axudarnos a darlle vida a todo ese patrimonio medieval musical, escrito en arte e pedra, o cal afortunadamente puidemos recuperar, e así poder ofrecer concertos en acústico en recintos históricos singulares como estes mosteiros, verdadeiros tesouros arquitectónicos”. O repertorio que Núñez ofrecerá nestes tres concertos serán cantigas e melodías interpretadas por músicos durante séculos, “sons que me devolven ás miñas orixes, sempre conectadas coa provincia de Ourense”, afirmou o músico.
