A Federación de Comercio de Ourense vén de presentar a edición 2016 das xornadas “Ourense é comercio”, unha iniciativa que busca revitalizar o comercio de proximidade e impulsar o consumo mediante a dinamización comercial. Nesta ocasión, farao da man da mediática Carmen Lomana, que protagonizará a primeira desas xornadas xunto coa influencer ourensá Cristina Bermúdez, con máis de 30.000 seguidores en Instagram. A cita será este mércores, 5 de outubro, ás 20:30 horas no Centro Cultural Marcos Valcárcel. A entrada é gratuíta.
Nesta primeira xornada, Lomana e Bermúdez contarán as súas experiencias de compra e as súas relacións co sector da moda e do consumo. Tamén está previsto un coloquio no que se dará acceso ao público, que terá oportunidade de participar con preguntas.
A segunda das xornadas será o vindeiro 11 de outubro, tamén ás 20:30 horas no Marcos Valcárcel. Nesta ocasión, a iniciativa contará coa presenza do humorista Moncho Borrajo. Falará das novas oportunidades de negocio no eido da moda, relacionadas co mundo das artes escénicas e dos espectáculos baixo o título “Novos xeitos de vender”.
Esta é unha iniciativa que se mantén da estratexia que viña desenvolvendo a anterior directiva da Federación, agora liderada por Beatriz Gómez. Ela mesma subliñou a “importancia” destas iniciativas “á hora de darlle visibilidade ao comercio local e de amosar o valor social e económico que ten a provincia de Ourense”. Tamén estivo presente nesta presentación o vicepresidente da Deputación, Rosendo Fernández, que destacou o papel do comercio local como “sinal de identidade”, tratándose dun “sector familiar, proximo e de calidade”.
