Castrelo de Miño pon en marcha, dende hoxe, un novo servizo gratuíto destinado ao coidado de nenos e nenas de atra tres anos a través do programa Casa Niño, promovido pola Xunta de Galicia. A “Casa Niño Os Paxariños”, que se localiza na parroquia de Prado de Miño, na antiga escola Prado-Vide, está xestionada pola técnico en Educación Infantil, Alba García.
En canto ao horario, este espazo estará aberto de xeito ininterrompido de 06:00 a 18:00 horas e ten capacidade para cinco prazas, das cales catro xa están cubertas. Este servizo busca a conciliación familiar e laboral, ofrecendo unha “atención integral e presonalizada” e está dirixido á atención das necesidades básicas de alimentación, hixiene e descanso, de acordo coa idade do infante. Por outra banda, tamén está enfocado a contribuir ao desenvolvemento físico, motor, afectivo, intelectual e social dos nenos, sempre en colaboración coa familia.
O servizo préstase en 60 metros cadrados da remodelada antiga escola pública municpal de Prado e Vide e conta con cinco berces, unha zona común, cinco hamacas para bebés e outras tantas tronas. Ademais as salas, o mobiliario e o resto de equipamento, contan con sistemas de seguridade que a normativa esixe para este tipo de servizos.
Este proxecto está promovido pola Xunta de Galcia e financiado parcialmente polo Fondo Europeo de Desenvolvemento Rexional, destinado a núcleos rurais de menos de 5.000 habitantes.
