ConcellosGalerías de fotosÚltima hora

Castro Caldelas, entre as 68 “Vilas máis bonitas de España”

Convértese na única localidade ourensá e nunha das dúas galegas que forman parte desta rede que promove a Asociación de Los Pueblos más Bonitos de España

A música tradicional dos Trabazos soaba na noite do 15 de xuño na praza do Prado de Castro Caldelas. “A rumba de Montealegre” abría un acto moi especial para esta localidade: a súa proclamación como unha das “Vilas máis bonitas de España”. Esta prestixiosa rede engloba a poboacións de menos de 15.000 habitantes baixo unha marca única de calidade, tal e como explicaba Francisco Mestre, presidente da Asociación de los Pueblos máis Bonitos de España, que iniciaba o turno de intervencións. Lembraba as orixes deste proxecto, nacido en Francia e cuxa idea se estendía a España no ano 2011, que actualmente engloba a 68 localidades, das que tan só dúas son galegas: Castro Caldelas, que vén de incorporarse, e Mondoñedo.

Mestre resaltaba a beleza paisaxística e natural de Castro Caldelas e o seu “espectacular patrimonio”. Comentaba o procedemento para poder entrar na rede e o que implica contar “con esta marca de calidade” tanto no ámbito da conservación como nos da proxección da súa imaxe exterior e dinamización turística. E incidía en que a idea é, a partir desta proclamación, que Castro Caldelas “siga traballando” nesa liña.

Pola súa banda, a alcaldesa caldelá, Sara Inés Vega, subliñaba que esta proclamación permitirá que “todo o mundo saiba que Castro Caldelas é unha das vilas máis bonitas de España, algo que nós xa sabiamos”. E explicaba os motivos deste recoñecemento comezando polo castelo medieval, o casco histórico cheo de casas blasonadas, mosteiros como o de Sampaio de Abeleda, as igrexas, tradicións como as do Irrio Peliqueiros ou os Fachós… Ademais, da paisaxe, gastronomía e viños desta terra. Expresaba o seu agradecemento ás persoas que traballaron para facer posible este recoñecemento: os traballadores do Concello, “cunha mención especial para Sonia e Roberto”, o grupo de goberno e “os meus veciños caldelaos” para os que pedía un aplauso. Ademais referíase á “boa acollida” que tivo Castro Caldelas dentro da Asociación Los Pueblos Más Bonitos de España.

Seguidamente tomaba a palabra o vicepresidente da Deputación de Ourense, Rosendo Fernández, quen resaltaba que o papel dos veciños de Castro Caldelas que souberon “coidar á súa vila como ninguén, por iso isto é unha conquista de todos vos”. Finalmente, a directora de Turismo de Galicia, Nava Castro, sinalaba que con esta acreditación Castro Caldelas “demostra o compromiso dos galegos coa conservación do patrimonio e da natureza e iso axúdanos a facer de Galicia un destino mellor. Agora vos sodes un exemplo para outras vilas galegas”.

O acto, presentado pola caldelá Lucía Rodríguez, incluía ademais a actuación musical do tenor Bernardino Atienza, que estivo acompañado pola voz dunha soprano e polo piano na interpretación de pezas de óperas de Puccini e tamén obras de zarzuela. De seguido, soaba a Real Banda de gaitas de Deputación de Ourense. O acto contaba coa presenza de numeroso público entre o que estaban autoridades como o subdelegado do Goberno en Ourense, Roberto Castro, a delegada territorial da Xunta en Ourense, Marisol Díaz, así como alcaldes de concellos como A Pobra de Trives e A Teixeira, ou a alcaldesa de Parada de Sil, entre outros.

Fotos: Carlos G. Hervella

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close