Coa entrega de agasallos aos presidentes das diferentes agrupacións remataba o tradicional Concerto de Nadal do Orfeón Trivés celebrado na tarde do 22 de decembro no Auditorio Julio Vázquez, da Pobra de Trives.
Un concerto no que colaborou o Concello da Pobra de Trives e que contou coa actuación de catro coros. O primeiro en subirse ao escenario foi o de voces brancas Coraliña Cantora, dirixido por Sandra González que interpretaron tres temas acompañados musicalmente por Manuel Simón Vila: Gaudeamus, Simamak e Maquerule.
Tralos sonoros aplausos que seguiron á actuación, tocoulle o turno ao Orfeón Caldelas, agrupación dirixids por Manuel Vila que debutaba hai un ano nun pequeno certame de Nadal en Castro Caldelas. Hoxe, en Trives, interpretaron cinco cancións: La baila, vilancico leonés harmonizado por J. Mª Álvarez; Boiadeiro, tonada brasileira harmonizada por Armando Cavaicanti; Ala nanita nana, vilancico popular andaluz; Unha noite no muíño, de Ángel Viro; e Festejos de Navidad (nadala peruana, Herbert Bittrich).
A Coral Polifónica Candea de Viana non quixo faltar á cita, interpretando para a ocasión outros cinco temas: Todos contentiños, panxoliña popular galega; Deseanolo señora, de A. Celada Alonso; Catro vellos mariñeiros, tradicional galega con arranxos de Fdo. Estévez; La reina del placer, de X. Montssalvatge; e Ven, ven, ven, tradicional galega con arranxos de Fdo. Estévez.
Os últimos en subir ao escenario do auditorio foron os anfitrións, os membros do Orfeón Trivés, coa súa directora Sandra González á cabeza que interpretaban cinco temas, entre os que estaba unha estrea, Viento del norte, de Nando Agueros. Tamén cantaron Benedicat Vobis de G.F. Haendel; 3 Motetes; Dadme albricias, anónimo do século VII; e Boliños do pote, vilancico popular galego.
O broche ao concerto poñíano os catro coros, cantando ao unísono sobre o escenario.
Fotos: Carlos G. Hervella