Con menos aulas de infantil e primaria e con menos profesores na provincia. Así arrancará o vindeiro curso 2016/17 segundo a Federación de Ensino de Ourense de CCOO, que vén de emitir un comunicado sinalando as modificacións do próximo curso. “Ourense perde para no curso 16-17 4 aulas de infantil, 3 de primaria e 8 postos de traballo. A consellería vén de publicar no DOG de 15 de xullo de 2016 o catálogo de centros de infantil e primaria onde veñen recollidas as modificacións de aulas e postos de traballo para o vindeiro curso 16-17”, asegura na súa nota de prensa CCOO.
Ademais o sindicato detalla os cambios que afectarán a un total de centros do rural, entre eles dous do oriente ourensán, pero tamén da cidade de Ourense:
“CEIP Padre Feijoo de Allariz: Perde 1 aula de primaria e 1 mestre de primaria.
CEIP Mariñamansa de Ourense: Perde 1 aula de de infantil e 1 mestre de infantil.
CEIP Virxe de Covadonga de Ourense: Perde 1 aula de infantil e 1 mestre de infantil.
CPI Padrenda-Crespos de Padrenda: Perde 1 aula de infantil e 1 mestre de infantil.
CEIP Manuel Respino de A Rúa: Perde 1 aula de primaria e 1 mestre de primaria.
CEIP de Sarreaus: Perde 1 aula de primaria e perde 2 mestres da etapa de primaria.
CEIP de Vilariño de Conso: Perde 1 aula de infantil e 1 mestre de infantil”.
CCOO Ensino incide asemade en que “un ano mais, Ourense sae especialmente perxudicada. Se temos en conta os datos dende o ano 2013 o balance non pode ser máis desolador, os peches das EEI de Entoma e Maside, CEIP de Montederramo, Xunqueira de Espadañedo e Calvos de Randin, únense a perda de 12 aulas de infantil, 6 aulas de primaria (-3% das aulas) e 23 postos de traballo (-2% postos de traballo), só en infantil e primaria”.
Por iso, CCOO Ensino solicita que a “modificación do catálogo anual se estableza dentro dunha negociación coas organizacións sindicais que garanta un ensino de calidade cunha adecuada distribución de aulas e RRHH atendendo a criterios pedagóxicos, socio-económicos e culturais, tendo como punto de partida o acordo de agrupamentos asinado no ano 2009”.
