A vindeira fin de semana 7 e 8 de novembro celebrarase en Expourense Celebra 2015, o Salón de Vodas, Bautizos, Comuñóns e Actos Sociais, “un escaparate para demostrar qué posible organizar un evento 100% ourensán”. Así o aseguraron na presentación que tiña lugar na mañá do 4 de novembro na sede da CEO nun acto ao que asistiron o director xerente de Expourense, Alejandro Rubín, e tres representantes das empresas que organizan as pasarelas do salón: Manuel Ángel Varela, director da Axencia Luena; Julio Gutiérrez, xerente de Paris Diffusion e Montserrat García, xerente de Isaura & Amanda.
A 16ª edición de Celebra contará con 64 expositores con produtos e servizos cos que dar resposta á planificación de todo tipo de actos sociai, dos cales preto do 80% son da provincia de Ourense aínda que tamén haberá espazo para empresas doutros puntos como Pontevedra e A Coruña, Madrid e Castela e León.
Unha quincena de sectores estarán presentes en CELEBRA destacando a oferta en organización e animación de eventos e servizos audiovisuais que son os que contan con maior representación. Tamén terán o seu espazo a moda nupcial e de festa, axencias de viaxes, aluguer de vehículos, repostería creativa, imprenta, florerías, xoiarías, fogar ou estilismo. Destaca a presenza de varias empresas especializadas na organización integral de eventos e animación, co que o visitante non só poderá coñecer as últimas novidades en servizos e produtos, senón que poderá recibir asesoramento e novas ideas.
Tal como adiantan dende Expourense, a implicación dun bo número de empresas da cidade con Celebra leva a que, por primeira vez, haxa tres pases da pasarela, coordinada pola Axencia Luena, que terán lugar o sábado ás 19 horas e o domingo ás 17 e ás 19:30 horas e contará coa participación das seguintes empresas: Al detalle eventos (decoración); Alvarino (vestidos noivo e festa), Drácena (arranxos florais), Isaura & Amanda (moda nupcial, festa e infantil); Loyma (xoiaría); Noar Novias (traxes noiva e festa); Nico y Nicoletta (moda infantil); Paris Diffusion (perruquería e estética); Passion Novias (moda noiva e festa); Quique Martínes (estilismo); Rosa Clará (Moda noiva e infantil); Sommera (moda festa) e Totallity Group (montaxe son e iluminación).
Esta edición de Celebra abrirá as súas portas o sábado e o domingo en horario de 11 a 14:30 e de 16 a 21 horas.
