EconomíaEconomíaGalerías de fotosÚltima hora

A CEO celebra o seu 40 aniversario

O presidente, José Manuel Pérez Canal, aproveitou o acto para pedirlle a Alberto Núñez Feijóo que se axilicen os proxectos de novas infraestruturas de comunicacións na provincia

Os empresarios ourensáns están de celebración. A Confederación Empresarial de Ourense (CEO) organizou unha cerimonia por todo o alto na cidade das Burgas á que tamén asistiron diferentes personalidades do mundo da política -deputados, senadores e membros da corporación municipal de Ourense-, así como o subdelegado do Goberno, Roberto Castro; o delegado de Defensa en Ourense, Gustavo Doncel; o presidente do Parlamento de Galicia, Miguel Santalices; a delegada territorial da Xunta en Ourense, Marisol Díaz. Así como os representantes do Poder Xudicial, entre outros.

O acto estivo presidido polo actual dirixente da CEO, José Manuel Pérez Canal, así como polo presidente da Xunta, Alberto Núñez Feijóo; o presidente da Confederación Española de Pequenas e Medianas Empresas (CEPIME) e vicepresidente da Confederación de Empresarios Españois (CEOE), Antonio Garamendi; o presidente da Deputación, José Manuel Baltar; e o alcalde de Ourense, Jesús Vázquez.

Antes de arrancar o acto na sede de Afundación en Ourense, o presidente da Xunta, Alberto Núñez Feijóo acudiu á sede da CEO, na Praza das Damas, para asinar no libro de honra da entidade. Xa en Afundación, o acto arrancou cun vídeo conmemorativo dos 40 anos da CEO, no que facían un repaso por todas a súa actividades dende a súa creación, o 5 de setembro de 1977, até a actualidade, baixo o lema “40 anos de compromiso por Ourense”.

Logo do vídeo, o primeiro en falar foi Pérez Canal, que salientou que neste tempo a CEO “contribuíu á paz laboral entre a patronal, os sindicatos e os traballadores”. Actualmente, o organismo conta con 90 asociacións afiliadas e 9.000 empresas. O presidente fixo referencia ao “compromiso social” da entidade e a súa vocación de “servizo aos traballadores”. Tamén fixo referencia ao apoio á internacionalización das empresas ourensás “coas misións comerciais que fixemos para dar a coñecer os nosos produtos”.

Pérez Canal aproveitou a ocasión para pedirlle a Núñez Feijóo que axude a axilizar as infraestruturas demandadas polos empresarios, como a execución da A-76, que unirá “Ourense con Valdeorras e Ponferrada”, dixo ; a autovía a Lugo, a circunvalación de Ourense e o enlace da A-52 co Polígono de San Cibrao xa que as actuais infraestruturas, asegurou, “non facilitan a comunicación e o desenvolvemento das nosas empresas”. O presidente concluíu o seu discurso mandando unhas palabras de alento “a aqueles empresarios que día a día érguense para buscar un porvir para as xeracións futuras”.

De internacionalización tamén falou o presidente da Deputación, José Manuel Baltar, que salientou os programa ExportOU e as misións comerciais, ambas levadas a cabo grazas aos convenios asinados polas dúas entidades , reiterando que “a CEO sempre foi unha man tendida” para a Deputación.

Pola súa banda, o alcalde de Ourense, Jesús Vázquez, salientou o traballo da entidade na cidade “rehabilitando o actual edificio no que están”, ao que se trasladaron no ano 1998 dende a Casa Sindical no Parque San Lázaro, e asegurou que “non hai mellor política social que a creación de emprego”. Vázquez finalizou o discurso co papel das institucións nese eido: “mediante bonificacións e redución de impostos ás empresas”.

Tras as verbas do alcalde, sucedeuse a entrega dos recoñecementos aos anteriores presidentes da Confederación Empresarial de Ourense. Francisco Rodríguez, presidente de 1993 a 2013; Manuel Cabezas, durante o 1993; Manuel Martínez, que presidiu a entidade entre o 1991 e o 1993; Miguel Ángel Pérez, presidente dende o 1986 até o 1990; Guillermo Collarte, dirixente da entidade entre 1983 até o 1985; foi a súa filla, Berta Collarte a que recolleu o premio. E, finalmente, Emilio Pérez Nieto, presidente do 1977 ao 1983.

E o propio Pérez Nieto foi o encargado de falar por todos os presidentes no estrado. O expresidente fixo un percorrido pola historia da CEO dende os seus inicios: “comezamos con moi poucos cartos”, dixo, e contou como pouco a pouco foron crecendo, “facendo viaxes por toda a provincia, coas infraestruturas daquela, explicando o proxecto” até a actualidade.

O encargado de pechar o acto foi o presidente da Xunta, Alberto Núñez Feijóo, que destacou o afán e a determinación dos emprendedores galegos, “elementos clave da recuperación económica”. Feijóo avalou as súas verbas con datos: “están a contribuír que a economía galega estea medrando por riba do 3%; a que se leven cinco anos consecutivos marcando cifras récord en exportacións, cun incremento do 8% no que vai de ano, e coa segunda mellor balanza comercial de España”.

Feijóo tamén anunciou, con respecto ás infraestruturas demandadas polos empresarios ourensáns, que nos Consellos da Xunta que quedan neste ano “vaise aprobar a licitación do enlace co Polígono de San Cibrao” e dixo que esta semana o ministro de Fomento, Íñigo de la Serna, estará en Galicia e que lle vai trasladar a petición da A-76 e o enlace de Ourense con Lugo, “que son as dúas únicas cidades que nos quedan por comunicar”, asegurou.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close