A Deputación de Ourense e a Confederación Empresarial de Ourense ( CEO) impulsan un programa de apoio a mulleres desempregadas por mor da crise do Covid-19. “Reactiva Mulleres Ourense” pon o foco en mulleres desempregadas con fillos ao seu cargo e outras responsabilidades familiares, para favorecer o seu reingreso no mercado laboral. O obxectivo: axudar a mulleres que perderon o seu emprego por mor da crise xerada pola pandemia, para que poidan reinserirse no mercado laboral. O programa, que aúna a experiencia neste tipo de accións da entidade empresarial e o financiamento do goberno provincial, é froito da colaboración institucional que manteñen CEO e Deputación de Ourense e que se materializa nesta ocasión en accións concretas #ante o desemprego feminino.
Os dirixentes de ambas as entidades, Manuel Baltar, presidente do goberno provincial, e Marisol Novoa, presidenta da CEO, anunciaban esta mañá a posta en marcha desta iniciativa, que comezará o próximo 7 de xuño. Manuel Baltar destaca que “no marco da alianza de colaboración permanente que mantemos coa CEO hoxe presentamos un plan que conta cunha dotación orzamentaria por parte da Deputación de preto de 40.000 € para reactivar o emprego feminino na provincia, neste momento de recuperación económica, afrontando as consecuencias do Covid-19”. Ademais, Baltar sinala que a finalidade deste programa “é chegar a todas as comarcas da provincia para prestar ás mulleres formación, asesoramento e novas habilidades, para contribuír a paliar as consecuencias negativas dun momento tan dramático como foi a pandemia e para que se poidan suavizar desde o punto de vista laboral e véxase un horizonte de empregabilidade”.
Pola súa banda, Marisol Nóvoa sinalaba que este programa xorde como consecuencia da notable destrución do tecido empresarial a causa do COVID-19. “Trátase de fomentar na provincia de Ourense o emprego feminino, que adoita ser máis precario, con contratos temporais, e nesta pandemia tiveron que atender aos fillos porque os colexios pecharon e tamén aos maiores porque os centros da terceira idade e os centros de día estaban pechados”. Nóvoa, quen agradece á Deputación o financiamento do proxecto, destaca que “se lles vai a asesorar; a facilitar ferramentas necesarias para que poidan acceder con máis facilidade ao mercado laboral, fomentando incluso o emprendemento”.
Sesións formativas ao longo da provincia
A proposta da Confederación Empresarial abarca toda a provincia, pois as sesións formativas distribúense xeograficamente, polo que poderán participar mulleres de calquera concello ourensán. Trátase de 15 horas de formación en liña de luns a venres, e poderán participar ata 20 mulleres en cada sesión semanal, polo que a cifra total de participantes superará o centenar.
As participantes terán acceso a asesoramento nunha serie de actividades que lles proporcionarán as habilidades, coñecementos e ferramentas necesarias, tanto laborais como persoais, para afrontar a súa reincorporación ao mercado laboral.
Este programa de reactivación do emprego feminino inicia a súa andaina a semana do 7 de xuño na comarca de Ourense, e completará o percorrido por toda a provincia convocando a continuación ás interesadas dos concellos pertencentes ao Carballiño e O Ribeiro (14-18 de xuño); Valdeorras, Terras de Trives e Terras de Caldelas (21-25 de xuño); Verín, Viana, A Limia e Baixa Limia (28 de xuño ao 2 de xullo), para terminar en Celanova, Allariz e Maceda entre o 13 e o 17 de setembro.
Ao termo da formación, as participantes desenvolverían habilidades profesionais e sociais que poidan incrementar as súas posibilidades de empregabilidade. Ademais, preténdese tamén xerar redes de contacto entre elas a través da formación, e espertar o espírito emprendedor, así como fomentar novas actividades económicas por esta vía.
Entre os contidos atópase o adestramento para o desenvolvemento profesional e persoal, ferramentas para mellorar a empregabilidade e de procura de emprego, o deseño dun bo currículo, os seus elementos diferenciadores e as novas tendencias, elaboración de cartas de presentación ou todo o necesario para preparar unha entrevista de traballo con garantías de éxito.
