Charlas e sesións prácticas na IX Semana da Orientación do IES Carlos Casares de Viana do Bolo

O acto central tiña lugar o 16 de abril e as xornadas continuarán de cara aos meses de maio e xuño

Ofrecer aos alumnos de Bacharelato e 4º da ESO, a posibilidade de coñecer de primeira man os plans de estudos das diferentes universidades galegas, doutras comunidades e incluso países como Portugal, é o obxectivo da Semana da Orientación que o IES Carlos Casares de Viana do Bolo organiza dende hai case unha década.

A inauguración da IX edición das xornadas tiña lugar na mañá 16 de abril no salón de actos do instituto vianés, contando coa presenza do director do centro, Carlos Ferreiro; do orientador, Plácido Blanco; do inspector, Roberto Cid; do alcalde de Viana, Secundino Fernández; e da xefa territorial de Educación de Ourense, Luz Fernández.

O acto contou asemade con representantes das Universidades da Coruña, Santiago, Vigo e Navarra así como da Universidade en Portugal e da Universidade Europea de Madrid, e os alumnos tiveron a oportunidade de coñecer as ofertas da Formación Profesional en Galicia (da man de profesorado do IES Xermán Ancochea de Trives), cun obradoiro de Electrotécnica; ou o funcionamento das diferentes plataformas dixitais na procura do primeiro emprego (infojobs, skype, linkedin,…)

 

Vista aérea do instituto de Viana do Bolo dende un dron.

Entre os asistentes a esta primeira  xornada estiveron Pablo Alonso, enxeñeiro de Camiños e ex alumno do instituto, que aportou a súa experiencia; e o coordinador de Iris Drone Specialists que falou sobre “o drone e o futuro” cunha demostración práctica.

Os actos de orientación continuarán no mes de maio coa visita guiada ao centro para o futuro alumnado de Bacharelato procedente do CPI Laureano Prieto da Gudiña, a cargo do vicedirector Ovidio Villar; e o acto de acollida do alumnado de ESO procedentes dos CEIPs de Viana, Vilariño e A Veiga, a cargo do xefe de Estudos Luis Felipe. E xa en xuño, haberá máis información sobre Bacharelatos e FP, a cargo da secretaria e do director Susana Fernández e Carlos Ferreiro;  así como exploración psicopedagóxica a cargo do orientador, Plácido Blanco.

Fotos: IES Carlos Casares.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies