Nada máis desembarcar en agosto de 1924 no porto de Vigo, Ruth Matilda Anderson, fotógrafa investigadora de Hispanic Society de Nova York, comezaba unha auténtica aventura percorrendo a Galicia da época, tanto urbana como rural, e retratando os lugares, aos seus habitantes e os seus costumes.
Levou a cabo un coidado, exhaustivo e valioso traballo que permitiu documentar a vida das xentes, en especial das zonas de complicado acceso, e que se plasmou na exposición “Unha mirada de antano: Fotografías de Ruth Matilda Anderson en Galicia”. Esta mostra chegará neste mes de novembro ao Barco grazas a un convenio de colaboración que veñen de asinar na mañá do 19 de outubro Abanca, Afundación e o Concello.
Á sinatura asistiron o alcalde do Concello do Barco de Valdeorras, Alfredo García; o director da zona leste Ourense de Abanca, Diego Daniel Fernández; e a coordinadora institucional para Ourense e Lugo de Afundación, Beatriz Fernández-Anguiano. A exposición, de entrada libre e gratuíta, inaugurarase o vindeiro 7 de novembro na Sala ABANCA (praza do Príncipe, s/n).