Dende pezas clásicas ata temas do repertorio popular galego. Seguindo a estela dos ciclos de primavera e verán, o Consorcio de Turismo Ribeira Sacra vén de presentar a súa proposta musical para o outono. Así entre setembro e outubro terán lugar unha serie de concertos en diferentes puntos desta zona situada entre as provincias de Lugo e Ourense. O primeiro deles terá lugar o día 27 de setembro ás 20h. na igrexa de San Vicente do Pino en Monforte de Lemos (Lugo). Alí poderá verse o espectáculo “Canto libre” de Rosa Leiro e Juan Carlos Cambas ao piano. No seu concerto poderá desfrutarse cunha escolma de pezas tradicionais galegas, folklores arxentino e fado portugués.
Xa en outubro, o día 5 o castelo de Castro Caldelas (Ourense) acollerá ás 19h. a actuación de Xavier de Acosta e Joaquín Barreira con “Obras de J.S. Bach para frauta e órgano” e, finalmente, o 11 de outubro ás 20h. o grupo instrumental Siglo XX, con Florian Viashi na dirección e ao violín, fará un “percorrido pola música para cuarteto de corda dende o clasicismo ata o século XX” no Mosteiro de Santa María de Montederramo (Ourense).
Ademais estes concertos terán un carácter benéfico xa que o que se recaude pola venta de entradas irá destinado a Cáritas e á protección do patrimonio. E, tal e como acontecía cos ciclos de primavera e verán, este conxunto de actuacións será promovido e organizado polo Consorcio e cofinanciado pola Axencia Turismo de Galicia.
“Unha vez máis, preténdese a posta en valor do patrimonio histórico-artístico e, no caso deste ciclo en concreto, crear oferta complementaria centrando a atención no outono como tempada prioritaria no plannig de promoción do Consorcio. Buscamos a desestacionalización nos meses en que Ribeira Sacra gaña un atractivo paisaxístico excepcional”, explican dende a organización.
