SanidadeÚltima hora

CIG Saúde alerta da perda de servizos e de recursos humanos no Hospital Comarcal Valdeorras

Esta central sindical demanda datos sobre a plantilla exacta do HCV e a dotación orzamentaria

Antonio Lorenzo e Suso Vilasánchez, de CIG Saúde, no exterior do HCV.

 

“Temos unha cantidade de problemas que indican que o Hospital Comarcal Valdeorras (HCV) está sendo desmantelado con perda de servizos, redución de recursos humanos e a ameaza clara de que imos seguir perdendo servizos”. Así de rotundos se amosaban os representantes de CIG Saúde, Suso Vilasánchez e Antonio Lorenzo, na rolda de prensa que convocaban na mañá do 24 de setembro para falar sobre a situación do centro hospitalario valdeorrés.

Os representantes sindicais comezaban pedindo á administración sanitaria os datos sobre o número de xente que traballa no hospital barquense e a súa dotación orzamentaria. “Como grupo sindical temos dereito a saber cantos médicos, canto persoal de enfermería e persoal non sanitario traballa no HCV, pero non conseguimos que se nos envíen eses datos e quizais non os envían porque iso está agochando a destrución do hospital. Tampouco se nos informa de se hai prazas reservadas para discapacitados ou non”, comentaba Suso Vilasánchez.

Falaban ademais dunha “redución de persoal, que obriga a situacións como as que tivo que padecer un especialista deste hospital, que se viu obrigado a encadear 19 días de gardas localizadas máis o seu traballo ordinario. Iso non é asumible. Tamén temos que informar á poboación de que hai uns días este hospital quedou sen o médico preventivista e temos indicios que de que podemos quedar sen dermatoloxía, algo que pasou en Verín, e tamén de que se pretende levar o especialista en anatomía patolóxica para Ourense, o que mermaría moitísimo a capacidade do HCV. Tampouco sabemos que vai pasar coa cociña hospitalaria, xa que agora mesmo estase implantando unha liña fría e iso implica unha diminución da calidade organoléptica dos alimentos e unha redución das plantillas. E estamos en contra do desleixo da dirección con respecto aos gardas de seguridade, cuxa empresa contratada por un organismo público non lles está aboando o salario”, aseguraba Vilasánchez.

 

Representantes sindicais da CIG na entrada do hospital valdeorrés.

 

Ademais Lorenzo referíase á situación do servizo de rehabilitación do hospital valdeorrés, “que estivo todo o verán sen ter pacientes aos que poder rehabilitar por uns problemas que tiñan entre os rehabilitadores en Ourense, que veñen aquí un par de días á semana, pero que non lle pasan eses pacientes aos fisios para que poidan facer a rehabilitación. Nestes momentos a cousa está un pouco mellor, pero aínda así segue habendo unha lista de espera de 400”.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close