“O de hoxe é un punto de inflexión na abordaxe da pandemia do Covid-19, que tanto sufrimento ten producido na nosa poboación. Acabamos de vacinar a 26 persoas (6 traballadores e 20 residentes) da Vivenda Comunitaria de San Marcos de Cudeiro, e o proceso transcurriu sen ningún tipo de incidencia”. Era a valoración que facía, pasada as 11h. deste martes 29 de decembro, o xerente da Área Sanitaria de Ourense, Verín e O Barco, Félix Rubial, ao inicio da campaña de vacinación do coronavirus na provincia.
Os residentes desta vivenda comunitaria recibían a primeira dose da vacina. O primeiro dos vacinados era Inocencio Corbal de 90 anos, natural de Sarreaus, que manifestaba a súa alegría polo feito de vacinarse, como un primeiro paso que lle permita poder volver abrazar a súa familia, en especial, a súa netiña.
A partir de mañá comezará a vacinación en diferentes puntos da provincia, entre eles as residencias de Valdeorras.
A primeira vacinación da provincia, paso a paso
Fonte vídeo: Área Sanitaria de Ourense, Verín e O Barco.