ConcellosÚltima hora

Comeza en Verín a recollida de tapóns para axudar a Valeria

É unha nena de 7 anos desta localidade que padece retraso global no desenvolvemento
O alcalde de Verín, intervindo na presentación da campaña que se desenvolverá en colaboración coa Fundación Amigos de Galicia ./ Foto: Concello de Verín.

O Concello de Verín acollía na mañá do 9 de marzo a presentación dunha nova campaña de recollida de tapóns solidarios que pretende axudar a unha nena do municipio. No acto participaban a traballadora social da Fundación Amigos de Galicia, Noelia Romero, e o alcalde de Verín, Gerardo Seoane. Esta campaña irá dirixida a Valeria, unha cativa de 7 anos que padece retraso global no desenvolvemento, hipotonía muscular, manifestacións distónicas leves, ataxia e apraxia oculomotoras.

“Valeria ten dificultades de mobilidade e na linguaxe, e o seu xuízo clínico recoñécelle unha discapacidade do 70%. Actualmente a Seguridade Social non lle cubre ningún tratamento para que poda mellorar a súa calidade de vida, e por ese motivo, a Fundación Amigos de Galicia comenza esta campaña. Con ela a pequeña poderá recibir sesións de terapia ocupacional, fisioterapia e logopedia en Ourense cun custo que ascende a unha cantidade de 890 euros mensuais, unha cifra imposible de asumir para a súa familia”, explican os promotores da iniciativa.

Para levar a cabo a campaña a Fundación Amigos de Galicia conta coa colaboración do Concello de Verín para financiar o custo total, que ascende a unha cantidade de 10.680 euros. O Concello farase cargo do 30% do custo total do tratamento, 3.204€, e a Fundación asumirá o 70% restante a través da campaña de tapóns, segundo se informa dende a entidade municipal.

Son moitos os quilos que fan falta para financiar os custes do tratamento de Valeria, pero dende a entidade espérase unha boa acollida por parte da cidadanía. Os interesados poden atopar os puntos de recollida de tapóns na páxina web da fundación e tamén se anima aos establecementos, colexios e cidadanía ourensá a converterse en puntos de recollida.

Esta campaña enmárcase dentro do convenio de colaboración asinado entre o Concello de Verín e a Fundación Amigos de Galicia para axudar ás familias do municipio en situación de necesidade, dando atención prioritaria á infancia e ás mulleres vítimas de violencia de xénero.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close