Galerías de fotosOurenseÚltima hora

Comeza o congreso internacional sobre San Martiño de Tours

Ata o venres 18 de novembro, expertos de dez países analizarán a figura do patrón de Ourense no 1.700 aniversario do seu nacemento

Soldado romano, monxe-eremita e bispo, San Martiño de Tours foi un personaxe “singular, carismático e de gran proxección internacional cuxa dimensión histórica trascende a súa época (316-397) para facer del un precursor modélico de integración europea, un ideal tan necesario como de extrema actualidade”. Con estas palabras do ourensán Jorge López Quiroga (Universidade Autónoma de Madrid) abríase o simposio “San Martín de Tours y su proyección en la Gallaecia de época Sueva”, o congreso internacional en conmemoración do 1.700 aniversario do nacemento do patrón de Ourense.

Organizado pola Deputación de Ourense, era o propio presidente, Manuel Baltar quen inauguraba, na maña do 14 de novembro no Centro Cultural Marcos Valcárcel, o evento que reúne ao longo desta semana a expertos de dez países para debater sobre a historia medieval e a evolución do cristianismo en Ourense. Expertos de Estados Unidos, Brasil, Gran Bretaña, Francia, Portugal, Austria e España analizan dende hoxe e ata o venres 18 de novembro, a figura deste santo e a súa influenza na configuración social, política, relixiosa e territorial da Gallaecia da época sueva. Jorge López Quiroga destacou de san Martiño “a súa personalidade e o seu carácter xeneroso e conciliador que non tería entendido de muros nin fronteiras, como acontece na actualidade”.

No acto inaugural, que contou asemade coa presenza do bispo de Ourense, Leonardo Lemos; do vicerreitor do Campus de Ourense Virxilio Rodríguez; e do medievalista Jorge López Quiroga, o presidente do goberno provincial dixo que este congreso “é unha aposta pola identidade ourensá, que posiciona ao noso territorio e supón situar a Ourense con pleno protagonismo neste ano Martiñano, no congreso máis completo sobre esta temática, ademais dos que se organizaron en Bos Aires e Tours, pois contamos con especialistas das mellores universidades do mundo, quen debaterán e achegarán novidades sobre a figura de san Martiño de Tours”. Antes de dar paso a primeiro ponente, Manuel Baltar anunciou para o ano 2017 a organización por parte da Deputación de Ourense dunha exposición titulada Tempore Suevorum “a primeira mostra sobre o primeiro reino medieval de occidente, creado no ano 414”.

A primeira ponencia do simposio correu a cargo de Michel Rouche (Universidade de París IV, París-Sorbona) que falou sobre “Martin contestataire de la Chrérienté romanine“. O programa de hoxe incluía as conferencias de Ian Wood (Universidade de Leeds); Bruno Dumézil (Universidad de París Ouest-Nanterre-La Défense); Francisco José Prieto Fernández (Instituto Tecnológico “Divino Maestro” de Ourense, Universidade Pontificia de Salamanca); e Francisco Fariña Busto (Grupo “Marcelo Macías”); así como as visitas a diferentes puntos históricos e arqueolóxicos da cidade.

Mañá, martes 15 de novembro, o congreso desprázase ao Liceo contando coas ponencias de Walter Pohl (Viena); Luis A. García Moreno (Universidad de Alcalá ); Tivadar Vida (Budapest); Christine Delaplace (Caen); Miljenko Jurkovic (Croacia); Pablo de la Cruz Díaz Martínez (Universidad de Salamanca); Alberto Ferreiro (Seattle); e Renan  Frighetto (Curitiba).

Fotos: Carlos G. Hervella

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close