Nesta semana vén de iniciarse en Quiroga un curso de limpeza industrial organizado pola Consellería de Política Social, dentro do plan da Estratexia de Inclusión Social de Galicia 2014-2020, e que se prolongará ata o 30 de abril.
O curso estase a impartir na Casa da Cultura e nel participan 10 persoas, co fin de cumprir coas medidas antiCovid, posto que neste tipo de iniciativas eran 15 as persoas que podían participar.
Os alumnos, pertencentes a colectivos en risco de exclusión social, recibían a visita do alcalde de Quiroga, Julio Álvarez, e da concelleira de Servizos Sociais, Loli Sánchez. O rexedor dáballes a benvida e lembráballes a importancia de contar con titulación para todos os traballos, polo que o bo aproveitamento do curso servirá para a súa profesionalización.
O Plan de Estratexia de Inclusión Social constitúe un marco integrado de intervencións orientadas a responder de maneira efectiva e coordinada ás situacións persoais e familiares de vulnerabilidade, pobreza e exclusión social, e procurar os apoios precisos para que as persoas destinatarias consigan a súa inclusión social e laboral.
