A ABAU (Avaliación de Bacharelato para o Acceso á Universidade) 2020 comezaba nesta mañá de 7 de xullo e seguirá durante os días 8 e 9. O Cosme López Rodríguez da Rúa volveu acoller a proba en Valdeorras cun cento de alumnos do IES Lauro Olmo e IES Martaguisela do Barco; Pablo VI e IES Cosme López da Rúa; IES Xermán Ancochea de Trives; IES Carlos Casares de Viana do Bolo; e IES de Quiroga.
Os alumnos comezaban a proba ás 9 da mañá coa presentación, onde se lles esixiu o uso de mascarilla e o xel hidroalcólico ao entrar. Habilitáronse tres entradas para os diferentes centros e cinco aulas, cando en anos anteriores eran dúas. Ademais, as medidas de seguridade reforzáronse con efectivos de Protección Civil da Rúa.
Nesta primeira xornada serán os exames de Historia de España, Lingua Castelá e Literatura, Matemáticas aplicadas ás CC.SS, Fundamentos da Arte, Economía da Empresa e Deseño. O mércores 8 será o turno de Lingua Galega e Literatura, Primeira Lingua Estranxeira, Matemáticas, Latín, Debuxo Técnico, Artes Escénicas, Segunda Lingua Estranxeira, Química e Grego.
Por último, o último día pola mañá serán os exames de Bioloxía, Historia da Arte, Física, Xeografía, Cultura Audiovisual, Xeoloxía e Historia da Filosofía. A tarde estará reservada para incidencias non previstas.
Fotos e vídeo: Carlos G. Hervella.