Neste luns 19 de novembro veñen de iniciarse as obras de empedrado da Fase C do Cemiterio Municipal, adxudicadas á empresa ACOVAL por un importe de case 33.000 euros. Segundo os prazos establecidos no prego de condicións, as obras estarán concluídas o próximo mes de xaneiro.
“A mellora do pavimento debería terse realizado nos últimos meses, pero atrasouse ata agora por problemas internos da empresa adxudicataria. A obra decidiuse debido a que parte das rúas do cemiterio atópanse cun pavimento que presenta dificultades para o seu mantemento e limpeza, así como de accesibilidade. A súa substitución por un novo adoquín, de dimensións, textura e cor igual ao construído na parte nova do cemiterio, outorgará unidade a todo o espazo”, segundo se informa dende o Concello do Barco.
Ademais da colocación de adoquín, esta actuación inclúe a execución dunha rede de abastecemento nun dos pasillos, a construción de varias arquetas e a instalación dunha nova rede de evacuación de pluviais, “polo que a renovación non só dará continuidade ao pavimento de adoquín colocado nas últimas fases do Cemiterio, senón que tamén se conseguirá unha mellora considerable da accesibilidade e da evacuación de pluviais en todo o recinto”, segundo o Concello do Barco.
