Numerosas persoas se reunían a partires das once menos cuarto da mañá do 14 de novembro diante do Edificio Administrativo da Xunta de Galicia en Ourense. A concentració, convocada pola plataforma PROCAPD, reivindicaba un Centro de Atención a Persoas con Discapacidade (CAPD) para Ourense. “Non queremos un centro ocupacional, senón un CAPD, que non é para nada o mesmo”, dicía unha das portavoces da plataforma, Elena Domínguez.
Dende a plataforma sinálase que non existen impedimentos urbanísticos para desenvolver ese proxecto, “o problema non é do edificio, senón de que hai que invertir, é necesario facer as cousas ben dende o principio”, matizaba tamén dende a plataforma Pedro Rodríguez. Ademais lembraba que “nós pedimos que o centro fora 100% público e no proxecto actual, que consideramos que non sirve, non está contemplada a cociña nin a lavandería. E no proxecto ten que figurar tamém un convenio coa Consellería de Educación para que esa cociña poda ser usada polo centro”.
Dende a plataforma din asemade que están dispostos “a esperar un ano máis polo centro residencial, na primeira planta poden meter os servizos todos e na segunda planta facer o internado”. E lembran que en Galicia funcionan xa neste momento tres CAPDs.
Entre os asistentes á concentración había representantes sindicais, como Etelvino Blanco da CIG, e tamén políticos, como é o caso do deputado autonómico de En Marea, Davide Rodríguez, de Manzaneda.
Fotos: Carlos G. Hervella.
