Concentración na Rúa “contra a deslocalización de Iberdrola”

Tiña lugar ás 12h. deste martes 7 de maio fronte á sede da empresa e concluía coa lectura dun manifesto que amosaba o “rexeitamento firme e rotundo á proposta de traslado”

Un cento de persoas concentrábase no mediodía deste 7 de maio fronte ao edificio de Iberdrola na Rúa nun acto convocado polos Concellos da Rúa e Petín “contra a deslocalización” desta empresa en Valdeorras.

 

 

Na concentración, durante a cal se recollían sinaturas, procedíase á lectura dun manifesto que comezaba sinalando que “recentemente vén de facerse pública a intención de Iberdrola de pechar o seu Centro de Operación de Conca (COC) na Rúa para trasladar ese servizo e os dezaseis postos de traballo a el asociados a Salamanca. Aló por 1955 a orixinaria Saltos del Sil principipou os traballos neste centro de control que continuou funcionando de xeito ininterrumpido até a actualidade sendo, probablemente, o máis antigo aínda en funcionamento de todos os que ten Ibedrola Grupo”.

 

No manifesto tamén se indicaba que o COC, “é, sen dúbida, o departamento máis emblemático das instalacións de Iberdrola na Rúa e no Concello entendemos que o seu traslado vai supoñer o peche definitivo da oficina no curto prazo”, incidindo ademais en que “unha consecuencia inadmisíbel do traslado a Salamanca sería que o control dos nosos ríos deixaría de estar no territorio propio para pasar a xestionarse desde outra comunidade autónoma”.

No manifesto amosábase o “rexeitamento firme e rotundo á proposta de traslado” e esixíase ademais “da Xunta de Galicia que se poña en contacto con Iberdrola para evitar a deslocalización definitiva da empresa do noso país. País produtor non só de enerxía hidráulica senón tamén eólica, que non pode sufrir máis as desvantaxes da produción eléctrica sen contraprestación”. O acto concluía entre aplausos dos asistentes.

Dende o Concello do Barco tamén vén de facerse público o apoio a este manifesto, tras un acordo tomado pola xunta de portavoces, tal e como se informa dende esta adminsitración local.

Fotos: Carlos G. Hervella.

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies