CulturaCulturaGalerías de fotosÚltima hora

Concepción Álvarez Pousa pecha na Rúa o ciclo de conferencias sobre Florencio Delgado Gurriarán

A filóloga vianesa disertou sobre a presenza da variedade valdeorresa do galego oriental na obra do poeta de Córgomo

 

Coa lectura do poema adicado a Ramón Otero Pedrayo  (Saúdo a Otero Pedrayo, Galicia Infinda), Concepción Álvarez Pousa pechaba a súa intervención na tarde do 29 de novembro, na Rúa. A filóloga vianesa era a encargada de poñer o broche ao ciclo de conferencias sobre Florencio Delgado Gurrirán que comezaban o 15 de novembro en Córgomo (Vilamartín de Valdeorras), continuaban unha semana despois en Carballal (Petín) e hoxe chegaba ao seu fin na Adega Peyma, en Fontei.

Trala apertura do acto por parte do concelleiro de Cultura da Rúa, José Vicente Solarat e da presentación da conferenciante a cargo da concelleira de Servizos Sociais, Joana Gómez, Concepción Álvarez comezaba a súa disertación sobre a a presenza da variedade valdeorresa do galego oriental na obra do poeta de Córgomo.

O autor valdeorrés “foi unha persoa amplamente comprometida coa cultura galega, o feito de que recibira unha boa formación académica para a época, en Valladolid, non fixo que mudase o seu galego oriental de Valdeorras polo castelán, senón ao contrario, seguiu cultivando a lingua materna”, dixo, asegurando que “a súa defensa polo idioma é evidente”.

 

A filóloga vianesa Concepción Álvarez Pousa na conferencia.

 

De forma minuciosa, a filóloga fixo un completo repaso por varias das obras de Florencio (Bebedeira, Galicia Infinda, Cantarenas e O Soño dun Guieiro) analizando os aspectos morfolóxicos, léxicos e gráficos dos versos. Palabras co plural en -is para os nomes rematados en –n (relación-relaciois), o uso das formas muito muto respecto do galego común moito, ou por exemplo as terminacións en –ao para formas como irmao fronte a irmán, ademais de termos como castañabulló ou bullote… Expresións do tipo: “Hai que meter os pais ao forno” ou “Teis muito/muto friu/frío?  “Na obra de Florencio Delgado Gurriarán están presentes todas estas formas do galego oriental e un léxico específico valdeorrés, que sempre se preocupou polo feito de que figurase nas obras que publicaba e se non aparecen máis formas ou hai certa variación de termos é por conta das edicións e correctores das obras”, dixo a conferenciante.

Tamén falou do Arquivo Galego Oral (AGO) con expresións e termos especídicos de concellos como O Barco de Valdeorras ou Rubiá e dalgúns proxectos que quedaron pendentes na mente de Florencio como a elaboración dun dicionario de valdeorresismos, antes de rematar cun muitas / mutas grazas!!

O encargado de clausurar o acto era de novo o concelleiro de Cultura, entregando a Concepción un pin das Letras de Florencio e unha réplica da placa de Lucio Pompeyo Reburro Fabro, dando paso a unha pincahda na cova da propia adega.

Fotos: Carlos G. Hervella

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close