Malia que nun principio estaba previsto que fose ao aire libre, na praza do Reloxo, finalmente, o concerto que a Banda de Gaitas “Os Trintas” de Trives celebraba na tarde do 23 de agosto tiña lugar na Casa da Cultura. Numerosas persoas acudían a esta actuación promovida pola agrupación co fin de recaudar fondos que lle permitan continuar co seu proxecto musical e formativo.
Nesta cita presentábase ademais publicamente “Trifixo”, a banda de gaitas que nace da unión nun proxecto común das agrupacións Os Trintas, Os Fiadeiros de Pereiro de Aguiar e a Banda do Irixo. Ademais sobre o escenario podía desfrutarse coa música de convidados como a Banda Os Xuncos (de Xunqueira de Espadanedo), Os Geraldiños acompañados polas cantareiras da Asociación A Caniceira, As Macizas Centrais;e o gaiteiro Óscar Ibáñez, ademais de varios músicos triveses que se xuntaban para a ocasión. O broche poñíao a banda anfitriona, Os Trintas de Trives.
Fotos: Carlos G. Hervella
Máis información na edición en papel do Periódico O Sil
