Co público en pé e cunha gran ovación finalizaba o concerto que a pianista María Domínguez ofrecía na súa vila natal, Trives, na tarde do 7 de xuño. O seu concerto, co que practicamente enchía o Auditorio Julio Vázquez, iniciábase coa “Sonata K. 9” de Scarlatti.
A partir de aí Domínguez despregaba un repertorio con composicións como “Fantasía nº. 2, K. 396” de Mozart, “Balada nº 2” de Liszt, “Estudos Op. 42” de Rautaavara, “Série Blanche” de Pierre Jodlowsky e “Dart” de Benjamin Van Esser.
María Domínguez está especializada na música contemporánea e está a desenvolver a súa carreira tanto como solista como en diferentes agrupacións orquestrais, de cámara e proxectos interdisciplinares en terras belgas. Na súa traxectoria musical conta con concertos, gravacións, investigacións e varios galardóns e recoñecementos.
Fotos: Carlos G. Hervella.
