Mañá, venres 20 de novembro ás 20 horas, Sara Marianovich, pianista serbia residente no Barco de Valdeorras, ofrecerá no Teatro Lauro Olmo un recital con obras de Mozart, Beethoven, Chopin e Schumann.
O acto está organizado pola Concellaría de Cultura e Educación con entrada gratuíta ata completar aforo.
Cunha longa traxectoria musical, Sara Marianovich ten actuado como solista, en dúo e acompañada por orquestras sinfónicas en varios países de Europa e Estados Unidos, realizando tamén diversas gravacións para emisoras de Radio e Televisión.
Nos seus programas de concerto a música española ocupa un lugar destacado, e en especial a obra integral para piano do mestre Joaquín Rodrigo, ao que coñeceu persoalmente, chegando a gravar unha das súas obras para un documental da Televisión RTS. Para Sony Classical realizou no ano 2001, nun dobre CD, a primeira gravación mundial da Obra Integral para piano só de Joaquín Rodrigo.
