Un ano máis, os alumnos de 4º da ESO do IES Cosme López Rodríguez da Rúa decidían organizar un desfile de moda co fin de recadar cartos para a excursión de fin de curso que este ano levaraos a Madrid.
O evento, no que participaron alumnos de diferentes cursos (algúns desfilando, outros moitos como público e outros botando unha man) tiña lugar na tarde do 15 de novembro no Centro Cultural Avenida e ademais dos animados pases de moda (casual, de festa, de pixamas e tamén deportiva) con coreografía incluída, o evento contou con actuacións musicais: primeiro unha peza de piano e violín, despois unha canción acompañada do piano e por último un rap.
Tralo desfile, os alumnos sortearon un xamón e un vale de 30 euros para canxear en Deportes Tri-Sport entre a xente que semanas atrás mercara rifas co mesmo fin de axudar economicamente aos estudantes.
Fotos: Mónica G. Bellver excepto as tres últimas que son cedidas.