Publicidade
CulturaCulturaMúsicaÚltima hora

Conexión musical entre Galicia e Portugal no MUMI Verín’20

Máis de 100 profesionais participarán neste encontro entre ambas industrias musicais, que se desenvolverá do 12 ao 14 no marco de "O teu Xacobeo"

Asistentes á presentación do I MUMI no Auditorio Municipal de Verín.

 

A organización do MUMI Verín’20, I Encontro Profesional de Música Galicia-Portugal, anunciaba na mañá deste 5 de marzo o calendario completo das actividades que desenvolverá nesta vila ourensá do 12 ao 14 deste mes no marco do programa O teu Xacobeo, promovido pola Consellería de Cultura e Turismo.

O director da Axencia Galega das Industrias Culturais (Agadic), Jacobo Sutil, participaba na presentación xunto a Diego Lourenzo e Emilia Somoza, tenente de alcalde e concelleira de Cultura do Concello de Verín; Ana Villarino, deputada de Turismo da Deputación Provincial de Ourense e os representantes da organización do encontro: Emi Candal, de Urdime SCG, e Inés Portela, de Madapro, pola banda galega, e José Costa, de Banzé, pola portuguesa.

No acto, Sutil subliñou o interese das propostas para os profesionais acreditados, como as seis palestras sobre asuntos que lles afectan directamente aos integrantes da industria musical (festivais, fórmulas de apoio á música, asociacionismo, oportunidades de financiamento á produción, contratación internacional e salas de concertos), as reunións personalizadas ou os showcases de Magín Blanco e A Banda das Apertas, Luca Argel, Silvia Penide, Ezetaerre, Barry White Gone Wrong, Xacobe Martínez Antelo Trío e Oîma.

 

Presentación do I Encontro Profesional de Música Galicia-Portugal.

 

Unha parte da programación ábrese, así mesmo, ao público xeral de xeito gratuíto, comezando polo concerto de benvida, que dará comezo o xoves 12, ás 19:30 horas coa cantante galega Uxía e o portugués Rui David como anfitrións dun espectáculo no que tamén actuarán Nastasia Zürcher, Dios Ke Te Krew e Dealema.

Ademais, tanto o xoves como o venres, as últimas citas musicais da xornada compartiranse cos espectadores que así o desexen, previa retirada dos convites no despacho de billetes do Auditorio Municipal, tanto para as actuacións neste espazo como para as da Casa da Cultura, e de entrada libre para as que terán lugar en diferentes bares de Verín.

Os galegos Familia Caamagno, Pálida e Os D’Abaixo mais os portugueses Cassete Pirata, Bad Legs e Spicy Noodles completan este cartel, que inclúe así mesmo animación e música e danza tradicionais nas rúas.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close