ConcellosGalerías de fotosÚltima hora

Conferencia, xogos, teatro e cine para conmemorar o Samaín no Barco de Valdeorras

A Biblioteca Florencio Delgado Gurriarán acollerá a “Festa de Medo” o 31 de outubro

Cunha programación moi completa se presenta este ano a celebración do Samaín no Barco. Unha tradición “moi nosa que está ensombrecida polo Halloween que nos chega de rebote, porque fomos os galegos os que levamos a festa a América e volveunos rebotada hai relativamente pouco tempo con outro nome”, asegura a concelleira de Cultura, Margarida Pizcueta. Por iso está especialmente orgullosa de poder contar cun dos maiores estudosos desta festa, Rafael López Loureiro, que dará unha conferencia o 30 de outubro. Ás 20h. achegarase ata a Biblioteca Florencio Delgado Gurriarán para falar “da transición do Samaín ao Hallomaín (Biografía dunha perversión) como debería ser pero os ingleses veñen pisando e ensombrecendo as nosas tradicións”, di Marga.

Despois dese aperitivo, o 31 de outubro será o turno para a “Festa de Medo na Biblioteca”. Tal como explica a propia concelleira, o motivo de facelo neste lugar é porque foi onde naceu hai tres anos como unha actividade de animación e porque “gústame que os nenos veñan á biblioteca non só a ler e estudar senón a divertirse”, pero pode que para o ano que vén cambien de ubicación. A festa comezará ás 18h. e haberá pintacaras, fotomatón e un concurso de disfraces con dous premios, un para o disfraz máis orixinal e outro para o que máis medo dé, para nenos e tamén para adultos cun premio moi especial: dúas entradas (unha infantil e outra adulta) para o Mega Jump da Coruña, que mestura o apartado lúdico co deportivo. Ademais a partires da 20 h. haberá un contacontos de medo a cargo de Zoe Ramos e Miguel Ortiz do obradoiro de teatro do IES Martaguisela, e en torno ás 21h. unha sesión de malabares a cargo do barquense Guti González na praza Andrés de Prada. Este ano ademais haberá de novo “Noite de Medo” para un máximo de 30 nenos de 5 a 9 anos. Quen desexe quedar a pasar a noite na biblioteca deberá inscribirse no propio local. Haberá cea, sorpresas e sesión de cine baixo a supervisión de dous monitores. A recollida dos cativos será ao día seguinte a partires das 9 da mañá.

A cousa non acaba aí e para o día 3 de novembro está prevista a representación da obra Drácula de Abubukaka, compañía de teatro canaria que está de xira por Galicia e recalará no Teatro Lauro Olmo a partires das 20h. cun espectáculo para todos os públicos. A programación de cine comercial da fin de semana tamén incluirá por primeira vez dous filmes de medo, un para o público infantil e outro para o adulto.

Relacionando o Samaín co magosto repetirase a exposición a cargo dos alumnos de Primaria sobre personaxes de medo da literatura galega que poderá verse na bibliotexa. E xa o día 11 de novembro como marca a tradición, rematará a programación co magosto popular na praza de Viloira a partires das seis da tarde.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close