Atletismo base, pero tamén absolutos. As pistas barquenses de Calabagueiros acollían en xornada de tarde este sábado 23 de marzo a I Xornada previa de atletismo en pista “Xogade” en Valdeorras e o 1º Control de marcas federado coa participación de numerosos atletas, especialmente de categorías base tanto de Valdeorras, como de comarcas próximas como Trives e Viana.
As probas comezaban a partires das catro e media tarde coas carreiras de 50 ml benxamín, seguidas das dos 60 ml alevín e do 50 ml (tríatlon) benxamín. Despois virían probas de lanzamento de xavelina en diversas categorías, de salto de lonxitude (tríatlon), etc.
Entre os clubs participantes estaban o Adas do Barco, o Club Atletismo Rúa, así como as Escolas Deportivas Municipais de Trives e o CEIP Bibei de Viana do Bolo. Estas probas foron organizadas pola Delegación Valdeorresa da Federación Galega de Atletismo (FGA), baixo o control do Comité Valdeorrés de Xuíces da FGA e co patrocinio do Servizo de Deportes da Xunta de Galicia.
Fotos: A.R.