Estes incendios, localizados en San Mamede de Edrada (Vilariño de Conso), levan queimadas 13,68 hectáreas de monte raso nun caso e 99,16 hectáreas no outro
A Consellería do Medio Rural vén de informar do control dos dous incendios forestais rexistrados no concello ourensán de Vilariño de Conso, parroquia de San Mamede de Edrada, e que afectan o Parque Natural do Invernadoiro.
Os dous lumes comezaban na tarde do mércores e, segundo as últimas estimacións feitas públicas por Medio Rural, afectan 13,68 hectáreas de monte raso nun caso e 99,16 hectáreas no outro, das cales 29 son arboradas e o resto rasas. No lugar levan traballado 5 técnicos, 38 axentes, 92 brigadas, 39 motobombas, 5 pas, 14 helicópteros e 7 avións.