O Consello Regulador da Denomimación de Orixe Monterrei convoca un concurso para seleccionar o cartel anunciador da ‘XV Feira do Viño Monterrei’, que terá lugar os días 12, 13 e 14 de agosto. Este certame estará aberto a deseñadores, pintores e artistas que poden presentar un máximo de dúas obras inéditas.
O formato único será de 43 x 63 cm (en posición vertical), e a obra poderá realizarse con calquera técnica pictórica, informática e fotográfica.
Concederase un único premio de 600 euros ao cartel gañador, que será seleccionado por un xurado conformado por persoas relacionadas co mundo da arte e do deseño, así como pola presidencia do Consello Regulador ou membros do pleno en que delegue e o alcalde de Verín e/ou persoas nas que deleguen.
Os carteis que se remitan ao concurso, enviaranse en soporte informático en arquivo .jpg ou .png en alta resolución (mínimo 300 ppp), á dirección mail infocrdomonterrei@gmail.com ou poderán entregarse na sede do C.R.D.O. Monterrei (Rúa Castelao, 10 Baixo. Verín).
A data límite de recepción finalizará ás 14 horas, do día 06 de xullo de 2022.
