Publicidade
CulturaCulturaEducaciónÚltima hora

Convócase o programa “Club de Letras” para centros educativos públicos no vindeiro curso

Este ano poderán incorporarse ata 70 novos centros escolares, ademais dos 30 que no presente curso se acolleron a el. O prazo de inscrición rematará o 30 de setembro

 

Mellorar as competencias lingüísticas, tanto orais como escritas, do alumnado a través de distintas actividades que fomenten o debate, a reflexión e a lectura crítica. É o obxectivo do programa “Club de Letras”, destinado a centros de ensino público galegos e cuxa convocatoria vén de abrirase para o vindeiro curso 2020-2021.

Esta iniciativa poñíase en marcha o curso pasado e a inscrición nesta nova convocatoria (aberta ata o 30 de setembro) vai dirixida a todos os centros públicos que imparten educación primaria, ESO e bacharelato. Este ano poderán incorporarse ata 70 novos centros escolares, ademais dos 30 que no presente curso se acolleron a esta iniciativa pioneira.

A temática elixida para o curso 2020/2021 é “o coidado, abordado desde unha perspectiva de responsabilidadade e corresponsabilidade nas tarefas e nos labores necesarios para a atención das persoas que están a padecer unha situación de vulnerabilidade causada pola enfermidade, pola pobreza, pola soidade, pola dor, pola violencia de xénero, pola LGTBIfobia ou outras circunstancias. Esta vulnerabilidade mesmo puido producirse e/ou agravarse durante o período de confinamento vivido a raíz da pandemia da Covid-19 e podería abordarse a temática do coidado neste contexto”, segundo a Consellería de Educación.

Os proxectos realizados sobre este tema poderán abordarse desde un punto de vista literario, artístico, filosófico ou histórico; e poderán centrar o seu foco de interese na actualidade, en anteriores etapas da historia ou conxugando ambos os dous enfoques.

O “Club de Letras” defínese como un espazo de aprendizaxe non formal baseado nunha metodoloxía de indagación. Neste marco o profesorado suxire diferentes accións enfocadas ao alumnado co obxecto de que poidan afondar, descubrir e coñecer novos eidos relacionados coas Humanidades, as Artes e as Ciencias Sociais. Fundaméntanse, polo tanto, nunha metodoloxía baseada no descubrimento, a indagación, o debate, a lectura reflexiva, a análise crítica, a creación e a aprendizaxe colaborativa.

No caso da educación primaria, a iniciativa achegarase a estes eidos do coñecemento fundamentalmente a través da escritura creativa, a exploración e creación artística, a lectura reflexiva e fomentando, de ser posible, unha achega lúdica e dinámica. Na educación secundaria e bacharelato procurarase unha visión transversal e interrelacionada das manifestacións literarias e artísticas, abordando perspectivas filosóficas e/ou históricas, así como a potenciación da capacidade creativa e de lectura reflexiva, coa finalidade de fomentar competencias de comprensión e de pensamento crítico do mundo actual.

Solicitudes

O departamento educativo da Xunta de Galicia destina un total de 100.000 euros a esta convocatoria, e cada centro recibirá unha achega económica de 1.000. Os centros que desexen solicitar por primeira vez ou renovar a súa participación no “Club de Letras” deben presentar a solicitude correspondente e máis unha breve descrición do proxecto que se vai desenvolver no curso 2020/2021.

O club deberá estar formado por alumnado e profesorado e será coordinado por unha das persoas docentes participantes. Cada centro educativo desenvolverá o “Club de Letras” fóra do horario lectivo e o tempo dedicado a esta actividade deberá chegar a, polo menos, unha media de catro horas ao mes comezando a partir da concesión definitiva do proxecto e ata o final do período lectivo do alumnado dentro do curso 2020/2021.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close