A partir das 23h. do vindeiro martes 2 de xuño está previsto un corte de auga que afectará ao subministro domiciliario do Barco de Valdeorras. Así se vén de anunciar dende o Concello. Este corte farase para proceder á reparación dunha avaría detectada na saída do depósito regulador de augas de subministro domiciliario deste municipio, tal e como sinala o alcalde, Alfredo García, nun bando informativo emitido este luns.
O corte manterase ata que terminen os traballos, “previsiblemente en torno ás 05,00 horas da madrugada do mércores, 3 de xuño. Durante esas horas, o subministro de auga quedará interrompido”, segundo indica o rexedor.
Neste senso, dende o Concello recoméndase á veciñanza que, “co fin de garantir tanto o subministro de auga nos seus domicilios como a hixiene, adopten as medidas necesarias para elo”.