A Xunta de Galicia porá en marcha, nos vindeiros días, unha unidade específica para atender aos centros escolares no seo da Central de Seguimento de Contactos (CSC). Esta iniciativa é, froito da colaboración entre os departamentos de Sanidade e Educación, “co obxectivo de facer un seguimento do Covid-19 máis axustado á realidade educativa e para reforzar, aínda máis, a seguridade sanitaria nos centros”, tal e como se informa dende a Consellería de Sanidade.
Esta mesma mañá, os conselleiros de Sanidade, Julio García Comesaña; e de Cultura, Educación e Universidade, Román Rodríguez, mantiveron unha xuntanza para detallar o funcionamento desta nova unidade da CSC.
Ademais Sanidade apunta a posta en marcha de recursos coma a aplicación EduCOVID e os Auto COVID escola, para facilitar a realización de probas de detección do virus tanto ao alumnado coma ao persoal vencellado ao centro escolar.
