Publicidade
EntrevistasÚltima hora

Cristina Fernández: “O potencial online de Viana está nos seus produtos locais, ten cousas únicas”

Esta vianesa, creadora xunto a Jason Heaver de comproenviana.com, aborda nesta entrevista este proxecto de comercio online promovido polo Concello

Cristina Fernández, creadora xunto a Jason Heaver, da web comproenviana.com./ Foto: Carlos G. Hervella.

 

Dende castañas e embutidos, mel, carne de tenreira ou cabritos, ata negocios de hostalaría, carpinteiría ou mesmo desbroce de fincas. Son algúns dos produtos e servizos que xa se ofrecen e se promocionan de forma virtual no recén estreado portal comproenviana.com, que xa acolle a case un cento de empresas de Viana do Bolo.

Esta iniciativa xurdía da man da vianesa Cristina Fernández que, durante o estado de alarma decatábase do complicado que resultaba poder mercar produtos do municipio vía internet, xusto nun momento no que se disparaba o comercio online. A partir de aí desenvolvía a idea, xunto a Jason Heaver, e presentáballa ao Concello de Viana, que enseguida a apoiaba co fin de impulsar o tecido socioeconómico local nunha época complexa e marcada pola crise do Covid-19.

“Foron máis de 150 horas de traballo, máis de 100 visitas a comercios, cubrir numerosos formularios, bastantes quilómetros andados… Pero a acollida foi moi boa e contamos xa con 91 empresas e creo que imos pasar de cen”, comenta Cristina Fernández.

 

 

A web é moi dinámica, ten versión en galego e castelán, ademais de formato de móbil e acolle de balde ás empresas. “Espero que facilite atopar o que necesitamos aos veciños e á xente que vén de fóra”, engade Cristina Fernández que resalta a diversidade e riqueza de servizos deste concello e que resalta, de xeito especial, os seus produtos. “O potencial de Viana está nos seus produtos locais, que é onde máis venda online se pode facer, ten cousas únicas”.

– ¿Cómo xurde a idea de crear comproenviana.com?

Durante o confinamento decateime de que moitísima xente estaba mercando produtos online.  Comecei a mirar que estatísticas había, como estaban as compras por internet antes do Covid, e xa antes da pandemia un 65% das compras globais facíanse online, que é unha barbaridade. Mirei que había en Viana de acceso a tendas online e non atopei nada. A información que era obsoleta ou moi difícil de atopar.

Logo vin que outro estudo estimaba que no 2040 o 90% de todas as compras serán online, e iso xa axusta. E pensei, ¿como imos facer en Viana? Era necesario traer o ámbito comercial de Viana ao século XXI porque as páxinas que había eran como moi difíciles de navegar, había que modernizalas. Decidín facerlle a proposta da web ao Concello, que a apoiou rapidamente, e así empezamos. Logo propuxémosllo aos comerciantes e empresas do municipio e así empezamos. Pero basicamente foi a necesidade de modernizar e de estender o ámbito comercial do municipio.

 

Cristina Fernández durante a presentación da web.

 

– Aposta por reforzar a presenza online do tecido socioeconómico de Viana, pero tamén do propio municipio…

Necesitábamos ter un pouco máis de presenza online. E xa non só a presenza, porque están as compras que podes realizar e a xente que ten os seus negocios, senón que permite promocionar nun mesmo sitio o conxunto de produtos e servizos de Viana, hai de todo: onde comer, onde beber, onde aloxarse, onde arranxar un coche ou mercalo, unha funeraria… Por exemplo, se se necesita a alguén que desbroce unha finca en Viana, pódelo atopar na páxina claramente, de forma ordenada e modernizada, con links directos ás empresas que teñen as súas páxinas online, ou correos electrónicos e teléfonos, tamén imos difundir ofertas, eventos…. Está ben estruturada e contamos cunhas fotos fantásticas que aportou Andrés Ortiz, que dan ganas de vir a Viana a comprar.

– ¿Que acollida tivo entre os empresarios a iniciativa?
Estamos moi contentos, foi moi ben acollida. Temos xa 91 empresarios e aínda faltan por incorporarse. Vemos a xente moi animada e eu espero que guste.

 

 

– ¿Como valora a experiencia de elaborar e poñer en marcha este portal?

Desfrutei moito este proxecto e descubrín un montón de talento e de riqueza en Viana, hai moi bos servizos e uns produtos impresionantes… Hai que apoiar ao comercio de Viana, todo isto é un círculo, se nós compramos en Viana, se o diñeiro se queda aquí, haberá traballo, haberá cartos para saír, xente nos bares e máis xente que queira vir, é todo un círculo vicioso.

O que deberíamos preguntarnos cando estamos nunha cidade ou noutro concello e imos comprar algo é, ¿isto pódoo comprar en Viana? Pois se o podes mercar aquí, aínda que custe un euriño máis, pois cómprao aquí, que o deixas no teu concello e axudará no futuro, é importante. Hai que intentar facer ese esforzo.

Texto: A.R.

Fotos: Carlos G. Hervella.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close