EconomíaEconomíaÚltima horaViticultura

Cristina Pato xungue a música e a cultura vitivinícola nun concerto en Sober

A gaiteira ourensá, pregoeira da XXXVIII Feira do Viño de Amandi, estaba acompañada nesta actuación por Miguel Cabana (percusións) e Roberto Comesaña (acordeón)

Co público en pé, bailando a ritmo de muiñeiras e aturuxando remataba o concerto que a gaiteira ourensá Cristina Pato ofrecía na noite do 24 de marzo en Sober no marco da XXXVIII Feira do Viño de Amandi. Era o aperitivo musical do pregón que daría horas máis tarde, no mediodía do 25 de marzo, no recinto feiral.

A actuación comezaba coa artista tocando a gaita entre as butacas do Centro Sociocultural de Sober, camiño do escenario, para acompañar a Miguel Cabana (percusións) e a Roberto Comesaña (ao acordeón), mentres interpretaban “África”. Unha vez sobre o escenario, Pato deixaba a gaita polo piano.

De seguido, a gaiteira dirixíase ao público para manifestar que para ela era “unha honra poder estar aquí na terra da familia do pai, que é da Ribeira Sacra. Eu crecín entre Nogueira de Ramuín e Ourense, tamén coa comunidade que está ao redor da música e do viño”.

A partir de aí o trío de músicos embarcábase nunha singladura “polas músicas que nos foron empapando ao longo do tempo”. Dende composicións de raíz, pasando polo jazz e a música máis experimental, ata rematar con muiñeiras, atrapando ao público dende o primeiro momento. No decurso do concerto, Cristina Pato tocaba dous tipos de gaitas, a frauta, a pandeireta e o piano, ademais de cantar.

Fotos: Carlos G. Hervella

Artigos relacionados

Back to top button