A pandemia Covid-19 non ten precedentes na historia recente e estase estendendo rapidamente. Non se trata só dunha crise de saúde pública, senón dunha crise humanitaria que impactará na vida, a saúde e os medios de vida en comunidades ao longo de todo o mundo. De aí a importancia dos axentes sociais, das ONG’s e redes humanitarias.
Neste sentido, Cruz Vermella, presente en 192 países e con máis de 13,7 millóns de voluntarios, puxo en marcha unha operación internacional co obxdectivo de axudar ás comunidades máis vulnerables, frear a propagación do coronavirus e recuperarse dos seus efectos.
Na provincia de ourense, unha das medidas máis importantes que puxo en marcha foi lanzar unha campaña informativa dirixida a máis de 4.300 persoas usuarias de Cruz Vermella identificadas como especialmente vulnerables ante o coronavirus. “A información, pautas e consellos básicos que se transmiten son os trasladados polas autoridades sanitarias, con especial atención á Consellería de Sanidade e ao Servizo Galego de Saúde”, explican dende Cruz Vermella Ourense.
Ademais de proporcionarlles aos usuarios información relevante e acompañalos nestes duros momentos, en moitos casos de soidade e incertidume, Cruz Vermella en Ourense ponse a disposición destas persoas para “calquera axuda que poidan necesitar: alimentación, medicamentos, acompañamentos ao médico,…”
No caso concreto da comarca de Valdeorras con sede na Casa do Río Cigüeño, os voluntarios activaron tamén o protocolo de prevención, mantendo o contacto telefónico cos usuarios, “facendo un seguemento de cada caso”, explican dende a entidade. Tamén levan a cabo acompañamentos médicos “cando sexa imprescindible e sempre cumprindo con todas as normas de seguridade”; así como o reparto de alimentos e vales para supermercados “co fin de cubrir necesidades básicas de familias que nestos momentos necesitan do noso apoio”, din, lembrando que é unha tarefa que implica a moitas persoas xestionando o operativo, voluntariado e persoal técnico da organización. “Además, aproveitamos estas viaxes para lembrar ao vecindario os consellos para previr a transmisión do coronavirus. A información salva vidas”, conclúen.
Fotos: Cruz Vermella Ourense.
