A sétima andaina do Señor do Larouco dará a coñecer a riqueza paisaxística e patrimonial do municipio de Cualedro o vindeiro día 17 de setembro, cun traxecto de dificultade media de 18 quilómetros por camiños de terra.
A deputada provincial Montserrat Lama remarcou na presentación de hoxe, 11 de setembro, o compromiso da Deputación de Ourense co deporte e co fomento da vida saudable a través deste tipo de iniciativas e asegurou que “o percorrido desta proba permite aos participantes non só gozar do deporte, senón tamén do patrimonio natural e histórico deste municipio ourensán”.
Pola súa banda, o alcalde de Cualedro, Luciano Rivero, dixo que o obxectivo desta iniciativa é “dar a coñecer os recursos paisaxísticos e turísticos do noso municipio”. Ademais, Rivero sinalou que “podemos retomar esta proba dous anos despois posto que, nos anos anteriores, non puidemos celebrala por mor dos incendios forestais, polo que queremos que con ela tamén concienciar á xente de que co lume podemos todos”.
A saída da andaina será ás 9:00 horas dende a A Chaira por terras de Xironda e rematará no mesmo lugar. A participación na andaina é totalmente gratuíta e os interesados poderán anotarse no Concello de Cualedro ou na tenda Multisport de Verín, ata o vindeiro sábado, 16 de setembro. “Ata o momento contamos con máis de cen inscritos”, anunciou Luciano Rivero.
O colaborador do Concello de Cualedro, Eduardo Castro, asegurou que se trata “da andaina máis bonita que se fai por aquel entorno e na que nos xuntamos sempre máis de cen persoas”. Mentres que, a presidenta da Asociación de Sendrismo Ruta das Augas, Amaya Álvarez, animou a todo o mundo a participar nesta “proba sinxela e retomar o costume de subir de novo a Larouco para contemplar as súas paisaxes”.
