O equipo de arqueólogos que está a escavar o Castro de San Lourenzo en Cereixa (A Pobra do Brollón) xa conta con reforzos de 11 voluntarios, procedentes de diferentes puntos de Galicia, Andalucía e País Vasco.
Trátase do cuarto campo de voluntariado que se desenvolve neste castro, financiado pola Xunta de Galicia en colaboración co Concello da Pobra do Brollón. O campo prodúcese no marco do Proxecto San Lourenzo de arqueoloxía en comunidade.
O grupo de voluntarios apoiarán a sétima campaña de escavacións que se desenvolve no castro, e que están en marcha dende a semana pasada dirixidos por Xurxo Ayán. Este ano o obxectivo é ampliar a zona de escavación que se estende entre a ábsida da ermida e a muralla do castro, para procurar o límite da necrópole altomedieval e ver como conectan os restos medievais coa muralla antiga do castro, tal e como se adianta dende o Concello da Pobra do Brollón.
Ademais das tarefas no Castro de San Lourenzo, os voluntarios dedicarán o seu tempo libre a coñecer outros elementos patrimoniais de Cereixa e do municipio da Pobra do Brollón.
As escavacións no castro están abertas ao público. O programa de visitas guiadas “Déixate Guiar” que ofrece o Concello da Pobra do Brollón permite coñecer o Castro de San Lourenzo e ver as escavacións en primeira persoa.
As visitas ofrécense de mércores a domingo ás 11h., aínda que para ver os traballos arqueolóxicos en directo hai que asistir un día entre semana. As visitas guiadas son gratuítas, previa reserva no teléfono 674 939 673 (preferiblemente por WhatsApp).
