Logo dun ano sen celebrarse por culpa da pandemia, os devotos de San Francisco Blanco tiñan ganas de recuperar a tradicional romaría na súa honra que cada ano se celebra en Outarelo (O Barco de Valdeorras). E así o demostraron os numerosos fieis que na mañá deste sábado 5 de febreiro asistían á celebración nun cálido e soleado día.
Presidido por primeira vez polo novo párroco do Barco, Jesús Álvarez, o programa comezaba coa novena o 27 de xaneiro e xa na mañá deste sábado, despois das dúas misas anteriores (ás 10:30 e ás 11:30h.), ás 12:30h. comezaba á procesión coa imaxe e a reliquia deste santo, avogado dos males da cabeza, co acompañamento musical do grupo de gaitas Celtas Largos.
Trala procesión tiña lugar a misa maior oficiada polo párroco. Presidindo o altar, coma sempre, a reliquia de San Francisco (mártir nado no Tameirón, A Gudiña, e crucificado en Xapón), que os fieis tocaron e bicaron ao rematar os cultos.
Entre os asistentes, incondicionais grupos de amigos, entre eles os membros da Confraría de San Francisco que non faltan á cita. Moitos deles aproveitan o día para compartir unha tapiña de polbo á feira ou churrasco na praza do pobo, mantendo en todo momento as medidas do protocolo Covid. Tampouco faltaron as tradicionais roscas.
Fotos e vídeos: Carlos G. Hervella.
