Non é a primeira vez que se suspende por mor da chuvia pero nesta ocasión (aínda que máis tarde si chovería) o tempo si permitiu celebrar a procesión coa imaxe e a reliquia de San Francisco Blanco. Así, despois das tres misas anteriores, ás 13h. deste sábado 1 de febreiro os fieis deste santo, avogado dos males da cabeza, percorrían os arredores da capela en Outarelo (O Barco de Valdeorras), co acompañamento musical do grupo de gaitas Celtas Largos.
E trala procesión tiña lugar a misa maior oficiada polos párrocos do Barco e Veigamuíños Presidindo o altar, coma sempre, a reliquia de San Francisco (mártir nado no Tameirón, A Gudiña, e crucificado en Xapón), que os fieis tocaron e bicaron ao rematar os cultos.
Entre os asistentes, incondicionais grupos de amigos, entre eles os membros da Confraría de San Francisco que non faltan á cita. Moitos deles aproveitan o día para compartir unha tapiña de polbo á feira no local social e tamén no exterior cuberto cunha carpa. Tampouco faltaron as tradicionais roscas.
O apartado musical da fin de semana corre por conta de A Boa Festa, e mañá, domingo día 2 de febreiro ás 13:30h. haberá outra misa na capela, na horna a San Antón.
Máis información na vindeira edición en papel do Periódico O Sil.
Fotos: Carlos G. Hervella.