PolíticaÚltima hora

Davide Rodríguez (En Marea) pide no Parlamento galego liberar aos concellos do financiamento do servizo dos GES

Xunto ás súas compañeiras de grupo parlamentario Paula Vázquez e Carmen Santos, vén de presentar unha proposición non de lei sobre este tema para o seu debate no pleno da Cámara

 

Davide Rodríguez, deputado de En Marea por Ourense, intervindo no Parlamento galego.

Apartar o servizo dos GES (Grupos de Emerxencia Supramunicipais) da dependencia inmediata das alcaldías, encomendándoos ás Deputacións ou Consorcios Provinciais e garantir que o financiamento do seu servizo non teña participación municipal, repartíndose o mesmo entre Xunta e Deputacións. É o que piden os deputados de En Marea, Davide Rodríguez, Paula Vázquez e Carmen Santos na proposición non de lei que veñen de rexistrar no Parlamento de Galicia para o seu debate en pleno.

No texto da iniciativa os deputados apuntan que os “GES cobren zonas rurais e concellos de menos de 20.000 habitantes. Na actualidade, as 300 persoas que conforman os GES prestan servizo a 174 concellos, dos 313 concellos existentes”. Tamén lembran que no convenio vixente, “no relativo ás competencias correspondentes á Xunta de Galicia, establecese que a Vicepresidencia e Consellería de Presidencia, Administracións Públicas e Xustiza é o departamento encargado de xestionar as competencias que en materia de protección civil e emerxencias ten atribuídas a Comunidade Autónoma de Galicia, e máis especificamente, a Dirección Xeral de Emerxencias e Interior encadrada na súa estrutura. Pola súa banda, a Consellería de Medio Rural é o departamento encargado de xestionar as competencias inherentes ás medidas de prevención e defensa contra os incendios forestais”.

Ademais indican que ás “Deputacións Provinciais correspóndelles a asistencia e cooperación xurídica, económica e técnica aos concellos, para garantir a prestación integral e adecuada dos servizos públicos, no territorio da súa competencia, e en particular, participar na coordinación da administración local coa Comunidade Autónoma co fin de garantir os principios de solidariedade e equilibrio intermunicipal. De acordo co previsto na Lei 5/2007, do 7 de maio, de Emerxencias de Galicia, os órganos de goberno provinciais exercerán as súas competencias garantindo a prestación do servizo de protección civil e xestión de emerxencias, incluídos os servizos contra incendios e de salvamento, naqueles municipios que non conten con servizos propios”.

Por outra banda, proseguen “os municipios deberán prestar á súa cidadanía os servizos públicos que contribúan a satisfacer as necesidades e aspiracións da comunidade de veciños, entre os que se atopan a seguridade en lugares públicos e a protección civil e extinción de incendios, polo que teñen necesidade de contar con medios para poder facer fronte ás súas competencias, compartidas e concorrentes, en materia de protección civil e emerxencias”.

E inciden en que “nos diversos convenios asinados entre Xunta, Fegamp e Deputacións, entre as labores dos GES, ademais das típicas das emerxencias cotiás encárganselles labores de desbroce, tarefa totalmente incompatible coas emerxencias, xa que merma a calidade de resposta ante tales incidencias, ao ser estes servizos de resposta inmediata, tal e como se recolle na lexislación (Lei PC 17/2015 e Lei 5/2007 de Emerxencias de Galicia), así como traballos que non se poden catalogar como parte das emerxencias, deixando unha parte do convenio ao criterio do alcalde/alcaldesa de cada concello, para que dispoñan desta maneira libremente dun servizo ao seu antollo, encomendándolles traballos de barrendeiros/as municipais, construción, persoal para montar postos nas festas populares, persoal de vías e obras, etc. malversando un servizo que debe estar adicado á atención das emerxencias”.

Segundo o convenio en vigor, engaden estes deputados “a Xunta -a través de Vicepresidencia e da Consellería de Medio Rural- financia o 60% do custe, os concellos un 20% e a deputación respectiva o 20% restante. Algúns concellos comprometéronse en facer dos GES uns grupos de emerxencias dedicados única e exclusivamente ás emerxencias, onde se fan quendas de 24h, teñen categoría e soldo acorde as súas funcións e cumpren cun servizo de calidade para a cidadanía, pero isto so se da nalgúns concellos, polo que dende En Marea entendemos cómpre afastar o servizo dos GES da dependencia inmediata das alcaldías, posto que os concellos non deberan asumir o papel de control que teñen actualmente e os GES deberan pertencer a un consorcio provincial público, financiado pola Xunta ao 50% e polas Deputacións ao 50%”.

Por todo isto, dende En Marea pide na súa proposición non de lei que o Parlamento galego inste á Xunta “a afastar o servizo dos GES da dependencia inmediata das alcaldías, encomendándoos ás Deputacións ou Consorcios Provinciais” e a garantir que o financiamento do servizo dos GES non teña participación municipal”.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close