Davide Rodríguez (En Marea) pide no Parlamento galego axudas directas para o sector da castaña

Xunto a tamén deputada Paula Quinteiro, vén de rexistrar unha proposición non de lei sobre este tema e unha pregunta na Comisión Agricultura, Alimentación, Gandería e Montes da Cámara galega

O deputado Davide Rodríguez, de En Marea, intervindo no Parlamento galego.

A recente campaña da castaña ten sido unha das peores en moitos anos para este sector, vital para as economías das zonas rurais de montaña das provincias de Ourense e Lugo. Unha campaña que os deputados de En Marea, Davide Rodríguez e Paula Quinteiro, cualifican de “nefasta” xa que “minguou preto dun 70%”. Esta redución, din, foi “froito da seca, xeadas, pedrazo e da vespiña do castiñeiro, algo que dende En Marea tiñamos máis que avisado dende fai meses en canto a Consellería do Medio Rural mirou para outro lado”.

Neste senso os deputados veñen de presentar dúas iniciativas no Parlamento de Galicia, unha das cales é unha proposición non de lei para o seu debate en pleno na que piden que a Cámara Galega inste á Xunta de Galicia a “facer un estudo real das perdas producidas este ano por mor das inclemencias meteorolóxicas e pola avespiña do castiñeiro” e a “manter unha xuntanza cás organizacións agrarias, así como con representantes da IXP Castaña de Galicia e con produtoras, empresas transformadoras e comercializadoras para evaluar os danos e fixar cantidades a indemnizar”.

Asemade Davide Rodríguez e Paula Quinteiro inciden na “situación de excepcionalidade na que se atopan os/as produtores/as, transformadores/as e comercializadores/as de castaña” e nese sentido piden “habilitar unha liña de axudas específicas para paliar as enormes perdas sufridas na última campaña”.

No texto da iniciativa lembran que a castaña “complementa as economías familiares, polo que non estamos a falar só de comercializadores e empresas transformadoras, polo que a Xunta de Galiza tiña que ter xa, unha liñas de axuda que chegara a tódolos niveis na escala da produción e venda”.

Ademais da proposición non de lei, ambos deputados de En Marea rexistraban o 9 de xaneiro na Mesa do Parlamento unha pregunta para a súa resposta oral na Comisión 7ª Agricultura, Alimentación, Gandería e Montes, sobre este mesmo tempo. En concreto preguntan se a Xunta de Galicia ten previsto sacar algunha liña de axudas “para paliar as enormes perdas sufridas na última campaña”.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies