Publicidade
PolíticaÚltima hora

Davide Rodríguez pide no Parlamento galego melloras nas condicións de traballo dos empregados de Seaga

Este deputado autonómico de En Marea vén de presentar, xunto a Paula Quinteiro, na Cámara galega unha proposición non de lei para o seu debate en pleno
O deputado de En Marea Davide Rodríguez, intervindo no pleno do Parlamento galego.

Nun dispositivo de prevención e extinción de incendios forestais conviven diversos actores, “pero á hora do ataque directo na primeira liña de lume atópase o persoal que dirixe as tarefas (axentes e técnicos fundamentalmente) e o persoal que se enfronta ás lapas: brigadas contratadas directamente pola Consellería de Medio Rural e brigadas contratadas a través da empresa pública Seaga”. Así o explican os deputados de En Marea, Davide Rodríguez de Manzaneda e Paula Quinteiro na proposición non de lei que veñen de rexistrar na Mesa do Parlamento para o seu debate en pleno. Nela piden unha serie de melloras nas condicións de traballo dos empregados de Seaga.

Explican que “non existe diferenza ningunha entre estes dous tipos de traballadores e traballadoras á hora da extinción dos lumes forestais, están baixo o mesmo mando e actúan conxuntamente. Pero si existen varias diferenzas previas posteriores”, entre elas que “o persoal contratado directamente pola Consellería está incluído no V Convenio Colectivo do Persoal Laboral da Xunta de Galicia, mentres que o persoal contratado a través de Seaga non ten convenio nin se lle aplica o V Convenio. Aplícaselle o Estatuto dos Traballadores excepto, curiosamente cando se trata de reducir o salario pola aplicación dos recortes salariais aos empregados públicos”.

Rodríguez e Quinteiro entenden que os traballadores de Seaga “realizan as mesmas funcións que os seus compañeiros-as do Servizo de Prevención e Extinción de Incendios Forestais (SPDCIF), pero cobran menos, teñen menos dereitos, teñen contratos de menor duración, teñen que realizar tarefas de prevención e extinción na mesma xornada e ademais non se lles recoñece o tempo traballado”.

Neste senso, nesta iniciativa piden que o Parlamento inste á Xunta de Galicia a “aplicar o V Convenio Único do Persoal Laboral da Xunta de Galicia ao persoal de Seaga, á ampliación dos contratos a 9 meses, o mesmo que os das compañeiras-os contratados directamente pola Consellería, á eliminación do protocolo que obriga a realizar tarefas de prevención e extinción durante os meses de alto risco de incendios forestais e ao recoñecemento do tempo traballado en Seaga á hora de acceder ás listas de
contratación da Xunta de Galicia”.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close