Xa dende as seis da tarde centos de persoas dirixían os seus pasos polo camiño das Covas en Seadur (Larouco). A do Sábado Santo é unha data de referencia dende hai trece anos nesta localidade valdeorresa que abre as súas covas ao público para desfrutar do viño, de pinchos variados, música e dun ambiente festivo único que envolve tanto a adegueiros como a participantes.
Así sucedía na tarde do 3 de abril. Ao redor de 1.500 persoas se sumaban nesta edición a singular festa percorrendo as 18 covas abertas ata pasadas as dez da noite. A ruta estaba ademais animada pola charanga Nova Terra de Trives, así como por diversos grupos musicais improvisados que encheron de ritmo as covas.
Ademais de viños (branco e tinto), en cada unha das adegas os visitantes, cunca en man, podían desfrutar de variados pinchos (tanto fríos coma quentes). Xa pola noite, a festa desprazábase á zona da carpa onde se prolongaba ata a madrugada.
Texto: A.R. Fotos: Carlos G. Hervella
Máis información na edición en papel do Periódico O Sil
