Calzada Romana, a carón do polideportivo de A Valenzá acollerá mañá, sábado 29 de setembro, a I Romaría Feminista de Barbadás.
O programa de actividades comezará ás 11 da mañá cunha mesa de debate, a primeira de catro que se irán sucedendo ao longo da xornada coa participación de destacadas especialistas en materia de feminismo e igualdade no eido profesional. Á noitiña chegará o momento da música, segundo anunciou a responsable da organización, Ánxela González Cid, concelleira de Igualdade de Barbadás, coas actuacións de Xestreu, De Vacas, The Tetas Van e Sés, que pecharán a xornada.
Segundo a concelleira, “a xornada foi concebida como un espazo de debate, discusión e reflexión sobre o feminismo e a loita para acadar a igualdade, no que tivemos coidado de que se desenvolva de xeito transversal non so polos distintos aspectos e visións que se poidan dar, senon pola idea de facilitar unha ampla participación”, por iso, asegura que a súa pretensión “é expor a necesidade de transcender o recoñecemento das violencias que se exercen sobre as mulleres para poder apelar a responsabilidade que temos na deconstrución do heteropatriarcado e a construción dunha sociedade igualitaria para as persoas, sexa cal sexa o seu xénero, a súa orientación ou a súa identidade”.
Neste senso, suliña a edil de Igualdade, “contaremos cunha área infantil na que os cativos terán actividades lúdicas combinadas cunha programación propia vencellada á igualdade, posto que da educación en valores igualitarios deben vir os verdadeiros avances neste senso”.
