Con varias novidades porase en marcha o venres 4 de novembro a novena edición da Ruta das Tapas do Carballiño. Así, celebraranse dúas rutas, os primeiros e últimos venres de cada mes, e o prezo da tapa sube a 2 euros, pero cun incremento na calidade e cantidade dos pinchos.
Cogomelos e castañas serán os protagonistas da primeira xornada desta iniciativa, á que nesta edición adheríronse 21 establecementos hostaleiros: Restaurante A Fuchela, Da Vinci Café, Café Bar Esquina, Parrillada San Andrés, Vinoteca Abadía, Pulpería Asador Veracruz, Café Bar Soldado, Restaurante O Pituxo, Ningures, Cervecería Tapería Don Paco, Loft 27, Mesón Os Portales, Furancho do Toto, El Caserío Café Bar, Pulpería Plaza, A Raíña das Tapas, O Fiadeiro, Café Bar Peñasco, Tapería Novo Flamingo, Cafetería Romana e Restaurante Comonacasa. Un plano-guía recolle a ubicación destes bares, mesóns e restaurantes no roteiro da vila.
Así se facía público no cato de presentación deste roteiro gastronómico, no que o concelleiro de Turismo do Carballiño, José Manuel Dacal, aludía ás características desta iniciativa e no que tamén agradecía o patrocinio do Centro Comercial Aberto, da adega Pazo Tizón e a colaboración de Aspadisi, que repartirá os carteis de cada ruta polos bares.
O acto contaba asemade coa presenza do alcalde, Francisco Fumega; dos concelleiros de Cultura, Diego Fernández, e de Promoción Económica, Adolfo Nogueira, así como do presidente do Centro Comercial Aberto, Julián Garriga e da xerente deste centro, Noelia Mares; da xerente da Bodega Pazo Tizón, do presidente da Asociación de comerciantes da Praza de Abastos, Eligio González, e representantes dos establecementos hostaleiros.
Francisco Fumega resaltaba que esta iniciativa tiña como obxectivo a posta en valor dun dos sectores máis importantes do Carballiño, como son a hostalería e restauración, e agradeceu a súa implicación e superación para ofrecer cada vez un mellor produto e servizo. Por outra banda, Julián Garriga sinalaba que o Centro Comercial Aberto sumábase a esta iniciativa como unha forma de aunar esforzos entre o sector hostaleiro e o comercio, e felicitou ao concello e ao concelleiro de Turismo por promover eventos que redundaban na promoción destes sectores. Asemade, destacou o feito de que a presentación se realizase na Praza de Abastos, pois debe converterse no motor do movemento no centro do casco urbano, según dixo.
Ademais a xerente da adega Pazo Tizón amosaba a súa satisfacción por participar un ano máis nesta iniciativa encamiñada a darlle vida ao pobo durante o inverno, e promover a gastonomía local e a degustación dos bos viños, como o Pazo Tizón. Finalmente, interviña unha representante dos locais hostaleiros participantes, desexando que esta nova tempada resultase tan exitosa como o foi a pasada.
Neste acto de presentación tamén se amosaban diversas tapas elaboradas con cogumelos, castañas e outros produtos, que serán ofrecidos aos clientes na primeira xornada da ruta este venres, a partir das 8 da tarde. A cada cliente entregaráselle un cartón no que deberá reunir seis selos de establecementos participantes e optar a algún dos numerosos premios que se sortearán ao remate da tempada, por un custo total de 2.000 euros.
